L'antoloxía de Xuan Xosé Sánchez Vicente, disponible de baldre en delles llibreríes

Editóla l'Academia de la Llingua Asturiana (ALLA) con motivu de la entrega del II Premiu Nacional de Lliteratura Asturiana.

L'antoloxía de la obra lliteraria y filolóxica de Xuan Xosé Sánchez Vicente con poesía, teatru, novela, cuentu, estudios lliterarios y llingüísticos ta disponible en dos llibreríes de Xixón, Paradiso y La Buena Letra, na uviéina Trabe y na mierense La Llocura. Son de baldre, anque dende la institución afalen a los llectores a mercar dalgún llibru n'asturianu aprovechando'l pasu per estos comercios.

El 3 d'esti mes, Día de les Lletres Asturianes, el tamién académicu recibió'l II Premiu Nacional de Lliteratura Asturiana. “La so trayeutoria inteleutual y lliteraria conviértenlu nun referente y nun de los mayores activos de la lliteratura asturiana. Amás de cultivar con aciertu tolos xéneros (poesía, narrativa, teatru, ensayu), abrió caminos nuevos pa la llingua a partir d'un fondu conocimientu y respetu pola tradición, que foi de los primeros n'estudiar y asoleyar. Figura clave del canon lliterariu asturianu, tamién resulten indispensables les sos contribuciones crítiques a la hora d'establecer y consolidar esi mesmu canon”, espresaron dende l'ALLA nel momentu del fallu del gallardón triañal.