L’ALLA noma académicu correspondiente a Martino y a Rubiera, miembru d’honor

|
Xandru Martino y Pilar Rubiera

L’escritor Xandru Martino y la periodista Pilar Rubiera son miembros nuevos de l’Academia de la Llingua Asturiana (ALLA). La institución, que va acoyer a entrambos nel XLII Día de les Lletres Asturianes, decidió nomar nuna xunta estraordinaria al ribeseyanu como académicu correspondiente y como miembru d’honor a la uvieína.

L’actu del vienres 7 de mayu va tornar al Teatru Campoamor depués de tener llugar l’añu pasáu nel Aula Magna del Edificiu Históricu de la Universidá d’Uviéu, pero va siguir marcáu polos protocolos de seguranza énte la COVID-19. Asina, va ser d’aforu llendáu y por invitación, con entamu previstu al meudía.

Nesa cita l’ALLA va acoyer institucionalmente a los miembros nuevos. “Xandru Martino Ruz ye escritor en llingua asturiana y destaca poles sos aportaciones en cuantes a la narrativa y tien, amás, el perfil d’investigador, sobro too no que cinca a les adautaciones funcionales del léxicu del asturianu”, argumenta la decisión de la xunta estraordinara celebrada’l xueves.

Sobre Rubiera rescampla que “ye periodista con una llarga trayeutoria na prensa escrita y vien destacando, nes décades caberes, polos sos trabayos en rellación cola información cultural y, especialmente, polo que tien que ver cola dinámica social arreyada a la llingua asturiana. Arriendes d’ello fai un llabor de collaboración cola ALLA, de gran importancia pa la so proyeición pública”.

Por últimu, la institución quier “treslladar les sos más fondes felicitaciones, tanto a Xandru Martino como a Pilar Rubiera, y enfótase en que’l so llabor siga siendo el meyor encontu pa la dignificación de la llingua asturiana”.

Contador Estadistiques