Galán y Lombardía, propuestos como académicos de númberu y honoríficu

L’Academia de la Llingua Asturiana (ALLA) dará acoyida’l vienres 6 de mayu, XLIII Día de les Lletres Asturianes, a Inaciu Galán y Lisardo Lombardía. Entrambos foron propuestos como académicos de la institución, de númberu nel casu del periodista y escritor xixonés y honoríficu nel del médicu y xestor cultural llavianés.

Na Xunta Estraordinaria celebrada’l xueves votóse la propuesta d’estos dos nomamientos, saliendo aprobada polos presentes. D’esta forma Galán y Lombardía van algamar la condición d’académicos nel actu solemne previstu nel uvieín Teatru Campoamor, mesmu reconocimientu que l’añu pasáu recibieron Xandru Martino y Pilar Rubiera, de manera respeutiva.

Sobre’l xixonés, l’ALLA rescampla que ye “doctor pola Universidá d’Uviéu con una tesis sobre la llingua asturiana nel franquismu”, amás de “profesor d’asturianu en secundaria, un periodista con gran dedicación a la divulgación cultural y llingüística, con cuasi 20 años de trayeutoria en tou tipu de medios de comunicación, nos que desendolcó munchos papeles, dende la redaición y la presentación a la direición. La so formación académica inclúi amás una diplomatura en turismu y un máster en xestión cultural, ámbitos dende los que tamién tien producío material d’investigación y normalización de calter llingüísticu. La so obra lliteraria, como autor y traductor, toca estremaos xéneros y camina al par de la so obra académica, bayurosa y espardida en monografíes, volúmenes coleutivos y n’artículos de revistes científiques”.

Mentes, del llavianés, “médicu de formación y primer oficiu”, apunta que “desenvuelve, dende fai cuatro décades, una de les carreres más importantes nel ámbitu de la xestión cultural asturiana, llevando la dignificación de la llingua como norte. Ye cofundador del coleutivu etnográficu Belenos que, ente otres munches aiciones, edita la prestixosa revista ‘Asturies, memoria encesa d’un país’. Al traviés del sellu Fonoastur dio abellugu discográficu a dalgunes de les carreres musicales más relevantes de la escena folc asturiana. Primero como delegáu d’Asturies y depués como direutor, el so papel nel Festival Intercélticu de Lorient completa una figura que recibe les máximes distinciones: medaya de plata del Principáu d’Asturies en 2015 y Chevalier de l’Ordre des Arts et des Lettres de la República Francesa en 2021”.

Na semeya, Galán y Lombardía.