L'ALLA noma a David Guardado académicu de númberu

L’Academia de la Llingua Asturiana (ALLA) decidió esti miércoles en Xunta Estraordinaria declarar a David Guardado miembu numberariu de la institución. El filólogu xixonés, especialista universitariu en Llingua Asturiana, va recibir tal condición nel actu pol XLIV Día de les Lletres.

Nacíu nel 1970 y llicenciáu en Filoloxía Inglesa, amás de diplomáu n’Estudios Avanzaos en Filoloxía, “los sos intereses d’investigación pasen pela sociollingüística y la historia esterna de la llingua, mentanto que la so carrera profesional, venceyada dende 2001 al Departamentu de Conteníos y Productu de Prensa Ibérica, céntrase na tresformación dixital, ámbitu nel que ye una autoridá a nivel estatal”, rescamplen dende l’ALLA.

Tamién el fechu de que Guardado sía un “pioneru na presencia del asturianu n’Internet”. Nesi sen, l’académicu nuevu foi ún de los fundadores d’esti mediu dixital, Asturies.com, xunto con Fernando de la Fuente nel 1997. Tamién tien participao en dellos proyeutos editoriales d’Araz.net –empresa editora d’Asturies.com– como coordinador y traductor, espublizando nel 2008 con Araz Llibros ‘Llingua estándar y normalización llingüística. La revitalización de les llingües subordinaes’.

“Yá dende la última década del sieglu pasáu foi coautor d’estremaes iniciatives que, enfocaes na información xeneral y cultural, contribuyeron enforma a asitiar el nuesu idioma na virtualidá y dientro del campu de les nueves teunoloxíes de la información”, apunta al respeuto la institución, que, sobre la estaya teórica señala que “David Guardado, desenvuelve una esmolición académica sobre l’asturianu que tien los sos finxos na normalización, la estandarización, la codificación y la identidá”.

Pa finar, fai referencia al “so llargu compromisu históricu cola militancia llingüística” y la so participación “en proyeutos editoriales, culturales y sociales, como ‘Reciella, families pol asturianu’, asociación que trabaya na organización d’actividaes dirixíes a la tresmisión interxeneracional del asturianu.

L’ALLA va dar acoyida al xixonés como académicu de númberu na Xunta Estraordinaria pol XLIV Día de les Lletres Asturianes, que va tener llugar el vienres 5 de mayu a les 19 hores nel uvieín Teatru Campoamora. Nesi mesmu actu Lourdes Álvarez va recibir el III Premiu Nacional de Lliteratura Asturiana.

Na imaxe, Guardado nuna intervención nuna comisión de la Xunta Xeneral. Semeya obra d'Iván G. Fernández.