“La estratexa comunicativa de les instituciones ye vital pal so reconocimientu social”, afirma Guardado

La esperiencia nel campu de la tresfomación dixital y nel trabayu na tresmisión xeneracional son, pa David Guardado, les cuestiones nes que más pue aportar a l’Academia de la Llingua Asturiana (ALLA). L’académicu de númberu nuevu, agradecíu poles munches felicitaciones “sinceres” que vien recibiendo, espera “poder facer coses y trabayar p’ameyorar tolo que se pueda la situación del asturianu”.

“Prestóme muncho’l nomamientu. Pa cualquier persona que lleve tantos años involucrada na cuestión de defensa y de recuperación del asturianu ye una cosa mui prestosa. L’Academia de la Llingua ye la institución cimera nesi ámbitu y soi consciente de qu'hai muncha xente que tien munchos méritos y que podría tar ehí tamién”, declaró Guardado a Asturies.com, mediu que fundó xunto con Fernando de la Fuente nel 1997, hores depués de facese públicu la decisión de la institución.

Sobre los méritos p’acceder a esti reconocimientu rescamplaos pola ALLA, el filólogu xixonés analizó les cuatro cuestiones. “Una ye la del compromisu llingüísiticu, y otra’l conocimientu dende’l puntu de vista técnicu que pueda yo tener de trabayar con cuestiones normatives y sociollingüístiques y, por supuesto, tamién la xera que llevó a la presencia nes redes del asturianu dende'l final del sieglu pasáu".

Tamién ta “el llabor míu profesional coles nueves tecnoloxíes y la tresformación dixital, la xestión d'equipos y el trabayu de proyectos con oxetivos y plazos, que creo que pue ser interesante pa l’Academia. Una institución, y en concreto una academia, siempre tien que tar al día de los cambios en cuestiones tecnolóxiques porque la comunicación cada día ye más importante. La so estratexa comunicativa ye vital pal so reconocimientu social”. 

A disposición de les necesidaes académiques

El cuartu tema que cita l’ALLA ye’l de la tresmisión xeneracional, “que me prestó especialmente poque ye un reconocimientu a esi trabayu cola asociación Reciella, que ye mui difícil pero que yera mui necesariu. Ye una cuestión cola que l’Academia lleva munchos años, dende que sacó la colección ‘Escolín’, prácticamente al principiu, y l’asoleyamientu de materiales pa neñes y neños”.

“Ye importante anovar les estratexes y Reciella supunxo  un intentu d’innovación. Esa esperiencia y esa visión trataré de tresmitila a l’Academia na midida que pueda”. Sicasí, apuntó que “l’Academia tien una estructura interna, de comisiones y demás, y toi a la espera de lo que l’Academia considere sobre cuál ye’l meyor sitiu onde yo puedo aportar”.

Por último, Guardado quixo agradecer los munchos mensaxes que vien recibiendo dende que se conociera’l so nomamientu. “Prestáme muncho porque hai xente mui distinto, mui variao, y paezme que son felicitaciones sinceres. Yo lo qu’espero ye poder aportar y que la mio participación nun seya una cuestión puramente nominal, sinón que pueda realmente facer coses,  trabayar p’ameyorar tolo que se pueda la situación del asturianu y la proyección social de l'Academia”.