L’ALLA esixe a les instituciones “‘cero cesiones’” énte les “amenaces del radicalismu políticu” contra l’asturianu

“L’Academia, enfotada en que la censura llingüística de la intrasixencia política tope col puxu democráticu de la sociedá y con una garantía institucional de ‘cero cesiones’”, entitula la institución un comunicáu asoleyáu depués de les situaciones últimes vivíes en Xixón contra l'asturianu. “Nun van dase arrenuncios individuales nin coleutivos nel usu cotidianu y artísticu del idioma”, asegura.

“L'Academia de la Llingua Asturiana (ALLA), nel so llabor estatutariu de curiáu de los derechos llingüísticos, quier manifestar el so enfotu na respuesta firme y tranquila de la ciudadanía y de los axentes más direutamente afeutaos poles amenaces del radicalismu políticu, persabiendo que, gracies a la madurez algamada nel procesu de normalización llingüística, nun van dase arrenuncios individuales nin coleutivos nel usu cotidianu y artísticu del idioma”, entama'l testu espublizáu esta mañana. Asina, “con tola claridá” la institución académica espón el so posicionamientu nuna serie de puntos, que son los siguientes:

• Enfótase na intensidá del puxu democráticu na sociedá asturiana.
• Refuga dafechu cualesquier intentu de censura o prohibición de les manifestaciones culturales públiques n’asturianu y de toa estratexa dirixida a menguar l’usu de la nuesa llingua.
• Demanda, nesti sen y solemnemente, el cumplimientu de la Declaración Universal de los Derechos Humanos, de la Constitución Española, de la Carta Europea de les Llingües Minoritaries, del Estatutu d’Autonomía y de la Llei d’Usu y Promoción del asturianu.
• Esixe a les instituciones públiques una garantía de “cero cesiones” y toles prevenciones executives nel cumplimientu específicu, de mou especial nos conceyos, de los mandaos llegales en materia llingüística.
• Sofita a toles y tolos artistes que tienen al asturianu como llingua normal del so facer y como espresión de la so llibertá creativa.
• Ufre les instalaciones de l’ALLA y el so sofitu a esti coleutivu artísticu pa desendolcar cualesquier aición defensiva en rellación con estos ataques (comunicaos a la opinión pública, presentación de manifiestos, ruedes de prensa, etc.)