“A partir de ahora, ‘Gijón”

La conceyala de VOX que va encargase del área de Festexos llueu del alcuerdu con Foro pa la entrada d’esti partíu nel gobiernu del Conceyu de Xixón col PP nun dulda a la hora de responder qué visibilidá va tener el topónimu, oficial xunto con ‘Gijón’, Xixón. “A partir de ahora, ‘Gijón’”, afirma Sara Concepción Álvarez Rouco.

Nuna entrevista al diariu ‘El Comercio’, la tamién diputada –cargu que pretende compatibilizar coles sos responsabilidaes como edil– esplica que namás podrán imponer esti criteriu escluyente dientro del ámbitu nel que trabayen, anque opina que en too “sería lo ideal”. “Todo lo que sea de nuestra área pondrá ‘Gijón’”, afirma.

¿Les razones? “A nosotros nos parece mejor ‘Gijón’. Tenemos un lenguaje castellano riquísimo. Y si es ‘Gijón’, es ‘Gijón’.

Foro cedió a VOX Festexos, que va llevar Álvarez Rouco, y la xestión de Divertia, de la que va encargase l’otru edil de la formación, Óliver Suárez Rubio, a cambiu de los sos votos pa investir a Carmen Moriyón como alcaldesa. Na so mano va tar la xestión del Teatru Xovellanos o’l FICXixón, y la organización del programa braniegu d’actividaes, l’Antroxu o la Fiesta de la Sidra Natural, ente otres folixes.

Na imaxe, logu de la villa cola forma castellanizada 'Gijón' nun elementu decorativu navidiegu, única que va emplegar VOX en tolo rellacionao con Festexos y qu'entame Divertia.