La XLIII Selmana de les Lletres Asturianes programa un conciertu d’homenaxe a Ígor Medio na Llaboral

El martes 3 de mayu va arrancar la XLIII Selmana de les Lletres Asturianes, esti añu dedicada al músicu y dibuxante Ígor Medio. Al igual que los años últimos, va estrenase un documental y editase un llibru sobre la figura del autor, a los que se suma nesta edición un conciertu d’homenaxe cola participación de docenes de músicos.

Va ser el miércoles 4 a les 20 hores nel xixonés Teatru de la Llaboral baxo’l nome de ‘El conciertu d’Ígor Medio’, y nél van participar Felpeyu y integrantes de Tuenda, DRD, La Bandina’l Tombo y Corquiéu. Tamién van tar presentes José Manuel Tejedor, Mapi Quintana, Bree Delian, Alberto Sánchez, Xuan Nel Expósito, Cástor Castro, Félix Castro, Toño Gómez, Xel Pereda y Isidro Suárez.

La entrada pal conciertu ye de baldre, anque ye necesario retirala de manera previa. Éstes van tar disponibles en Llaboral Ciudá de la Cultura, el Centru Niemeyer, el Centru d’Información Turística del Principáu d’Asturies, el númberu de teléfonu 985.96.97.08 o la web d’entraes de Liberbank (Unicaja Banco) dende’l miércoles al meudía.

Nun va ser l’únicu eventu musical de la Selmana de les Lletres. El xueves 5 va repetise un añu más el ‘Conciertu de les Lletres’ a cargu de la Orquesta Sinfónica del Principáu d’Asturies (OSPA), nesta ocasión baxo la direición de Daniel Sánchez Velasco, que, con Héctor Corpus como violinista solista, va estrenar el so ‘Concierto para violín y orquesta’.

Completen el programa ‘Tribute to Richard Estes’, de Juan Méndez, y ‘Córdoba en un sueño’, de Raquel Rodríguez. L’actuación va tener llugar nel Auditoriu d’Uviéu a les 20 hores

Otra manera, el martes 3 va entamase una ‘jam session’ nel xixonés Muséu Barjola cola participación d’Alberto Ablanedo, Rubén Bada, Pepín de Muñalén y Dolfu R. Fernández. Va ser depués de la inauguración, a les 18 hores, de la esposición ‘Xente llano de Xixón. La obra gráfica d’Ígor Medio’ que va tar abierta hasta’l 3 de xunu n’horariu de 11.30 a 13.30 y de 17 a 20, de martes a sábadu, y de 12 a 14, los domingos.

Coordinada por Barbero y Fernández

El tamién dibuxante y músicu Ruma Barbero, col que Medio fundó nel 1991 el grupu folk Felpeyu, y Norman Fernández Tascón, autor de delles monografíes sobre la historieta, amás de comentarista y articulista sobre cómics y collaborador habitual de la ‘Semana Negra’ de Xixón y d’otros eventos sobre’l cómic asturianu, son los coordinadores de toles actividaes d’esta Selmana de les Lletres dedicada al d’El Natahoyo, que se va inaugurar al meudía del martes 2 nel Paraninfu de la Llaboral cola presentación del llibru conmemorativu ‘Ígor Medio. El carbón y l’arena’ y la proyeición del documental ‘Onde soi quien quiero ser. Una semblanza d’Ígor Medio’. La obra editada pola Conseyería de Cultura, Política Llingüística y Turismu axunta nueve artículos qu’analicen l’heriedu d’esti creador y inclúi bien de testimonios gráficos de la so vida y obra.

L’actividá última de la gran fiesta de la nuesa lliteratura va ser el vienres 6, XLIII Día de les Lletres Asturianes, nel Barjola. Va consistir nuna mesa redonda entitulada ‘¿En qué andaría Ígor? El cómic asturianu güei’, cola participación de Raquel Lagartos, Ernesto García ‘Neto’ y el propiu Barbero, cola moderación de Chechu García.

Esti día, amás de los actos qu’entama l’Academia de la Llingua Asturiana (ALLA) esti añu nel uvieín Teatru Filarmónica, va celebrase’l Día del Llibru Asturianu, nel que 57 llibreríes de tol país presenten un 10 por cientu de descuentu en llibros y discos n’asturianu y gallego-asturiano y entrega’l llibru conmemorativu de la Selmana de baldre. Pal Eo-Navia edítase ‘Contos eonaviegos’, una escoyeta de 28 rellatos d’otros tantos autores espublizada pa la ocasión.