La XDLA recuerda que la oficialidá de la llingua propia “supón un beneficiu económicu pa la comunidá autónoma”

L’informe conocíu recién del impautu positivu del valencianu na Comunitat Valenciana, sumao a otros asemeyaos n'autonomíes billingües, son exemplos pa la XDLA de que la oficialidá “supón un beneficiu económicu pa la comunidá”. Considera que n’Asturies podría crear 10.000 emplegos y xenerar un 2 por cientu del PIB.

Les cifres del estudiu ‘Impacte i valor econòmic del valencià’, fechu pol Instituto Valenciano de Investigaciones Económicas (Ivie) por encargu de la Direcció General de Política Lingüística i Gestió del Multilingüisme de la Generalitat Valenciana, apunten que les actividaes venceyaes col valencianu aporten el 2,1 por cientu del PIB y el 3 por cientu del emplegu de la comunidá autónoma, esto ye 2.065 millones de euros y 56.367 emplegos, de manera respeutiva. “Nel casu del País Vascu, nel 2015 un estudiu del Gobiernu autonómicu cifró en 2.800 millones d'euros el valir de la llingua d'esa tierra, lo que supón el 4,2 % del PIB vascu y 56.142 puestos de trabayu –el 6,28 % del total–. Otra manera, según datos del Consello da Cultura Galega, la industria de la cultura d'esta comunidá xenera 30.000 empleos y 1.103 millones d'euros –el 2 % del PIB gallegu–”, añade la Xunta pola Defensa de la Llingua Asturiana (XDLA).

“Como se pue ver nel casu d'estes comunidaes, la oficialidá de les llingües propies, amás de reconocimientu de derechos y valoración d'un patrimoniu cultural incalculable, supón un beneficiu económicu pa la comunidá autónoma, afalando asina la puesta en marcha d'una economía moderna rellacionada cola creatividá”, apunten dende’l coleutivu cívicu, que calcula que “la oficialidá d'asturianu y gallego-asturiano y el so impautu na economía de la comunidá autónoma podía suponer la creación de más de 10.000 puestos de trabayu nuevos, xenerando asina alredor del 2 por cientu del PIB”.

“Nestos informes analízase cómo estos idiomes xeneren un impautu positivu na economía al ponese en marcha midíes concretes de normalización llingüística, como les relatives al enseñu de la llingua, servicios de traducción, asesoría llingüística, medios de comunicación, llibreríes, editoriaes, discográfiques, producción audiovisual o servicios de les propies alministraciones públiques”, sigue la XDLA, que fina’l comunicáu asoleyáu esta mañana destacando que “ta demostrao –nun fai falta poner exemplos– que la falta d'oficialidá nun supunxo p'Asturies ser una autonomía económicamente puntera a nivel estatal, polo que poner en marcha esti marcu llegal y apostar pola industria cultural pareznos la meyor manera d'encarar el procesu de cambiu que vive la economía asturiana, inxertada en metá del procesu de transición enerxética y que necesita desarrollar capacidaes clave pa la economía moderna y, al empar, ser capaz a proyeutar hacia l'esterior la 'marca Asturies'”.