El positivu impautu económicu d’una llingua: el valencianu crea 56.000 emplegos y xenera 2.000 millones d’euros

L’Instituto Valenciano de Investigaciones Económicas (Ivie) dio a conocer esti martes los datos del estudiu ‘Impacte i valor econòmic del valencià’, encargáu pola Generalitat Valenciana. Ésti reflexa que les actividaes venceyaes col valencianu aporten el 2,1 por cientu del PIB y el 3 por cientu del emplegu de la comunidá autónoma.

Los datos amuesen l’impautu económicu positivu del idioma propiu na economía d’una comunidá autónoma nel qu’ésti ye oficial, como ye’l casu de la Comunitat Valencia, que cuenta con una población cercana a la 5 millones d’habitantes. Asina, l’informe del Ivie destaca que la contribución direuta de les actividaes al rodiu la llingua valenciana ye de 1.307 millones d’euros de renta y 35.505 emplegos equivalentes a tiempu completu.

Si a esa cifra se suma l’impautu indereutu y l’inducíu, l’aportación medra hasta los 2.065 millones de euros, lo que supón el 2,1 por cientu del PIB autonómicu. “Amás, el gastu d’estos sectores permite mantener 56.367 emplegos equivalentes a tiempo completu, el 3 por cientu del total del emplegu na Comunitat Valenciana”, apunten dende l’Ivie, institución qu’añade que del impautu impautu total na renta (PIB) y el emplegu, “un 63 por cientu se xenera de manera direuta y el 37 por cientu restante de manera indireuta y inducida”.

Los cuatro sectores nos que l’informe encargáu pola Direcció General de Política Lingüística i Gestió del Multilingüisme identifica un papel determinante na xeneración d’impautu económicu por parte del valencianu son la nomada industria de la llingua (instituciones venceyaes al enseñu del valencianu, tanto públiques como privaes, asina como les empreses qu’ufren servicios de traducción y asesoría lingüística), el sector de la cultura y los medios de comunicación (llibreríes, editoriales, discográfiques, producción audiovisual, prensa, radio, televisión, etc.), la Educación (dende Infantil hasta la universidá) y los servicios pa la difusión y conocimientu del valencianu que s’ufren dende les propies alministraciones públiques. D’ellos, ye l’educativu’l que xenera’l mayor parte del impautu  total del valencianu, el 90,8 por cientu de la renta y el 87,3 por cientu del emplegu, sobre manera na enseñanza non universitaria, con 1.874 millones de euros y 49.187 puestos de trabayu.

“Per detrás de la educación, anque a gran distancia, asítiase’l sector de la industria de la cultura y medios de comunicación, que concentra’l 6,5 por cientu de la renta y el 10,6 por cientu del emplegu que xenera’l valencianu, lo que significa 133,6 millones d’euros de renta y 5.987 puestos de trabayu, ente direutos, indireutos y inducidos”, destaquen dende l’Ivie. Otra manera, el pesu del sector públicu ye del 2,2 por cientu en términos de renta y del 1,4 por cientu nel casu del emplegu, “mientres que l’aportación de la industria de la llingua ye muy reducida, sólo’l 0,6 por cientu y el 0,8 por cientu, de manera respeutiva”.

Según espliquen dende l’Ivie, pa la ellaboración del informe combinóse “delles fontes d’información, dende estadístiques oficiales, información de presupuestos públicos liquidaos, bases de datos a nivel empresarial y trabayu de campu, con cerca de 400 consultes feches a empreses del sector privadu”.

La oficialidá del asturianu

Les conclusiones del estudiu ‘Impacte i valor econòmic del valencià’ afiten que “la llingua nun ye namái un instrumentu de comunicación qu’ayuda a la cohesión de les sociedaes, sinón qu’amás ye una fonte de xeneración de riqueza como consecuencia de l’actividá económica que xenera”. Esti argumentu ye’l mesmu que se vien defendiendo dende hai años dende sectores favoratibles a la oficialidá del asturianu tomando como referencia les esperiencies n’otros territorios con llingua propia oficial, especialmente mirando pa Galicia poles asemeyances esistentes, y qu’esti estudiu sobre’l valencianu nun fai otra cosa que confirmar.