La XDLA considera insuficiente l'alcuerdu ente FSA y Asturies pela Izquierda sobre l'idioma

|
La XDLA considera insuficiente l'alcuerdu ente FSA y Asturies pela Izquierda sobre l'idioma

Sobre les propuestes de Podemos diz que "nun suponen un avance mayor".

La Xunta pola Defensa de la Llingua Asturiana (XDLA) amosó esta mañana la so esmolición pola declaración conxunta pa la investidura d'Adrián Barbón de la FSA y Asturies pela Izquierda no que respeuta al idioma, calificándola de "claramente insuficiente". "Les dos fuercies polítiques nin se lleguen a comprometer cola oficialidá y namás falen de buscar los apoyos necesarios p'algamar una reforma del Estatutu d'Autonomía que permita establecer esti marcu llegal. Nun s'entiende por qué la cuestión llingüística ye l'únicu puntu onde s'establez que depende de terceros. Pa tolo demás nun se fala de la necesidá d'una mayoría parllamentaria o de tener una partida presupuestaria...", apunta.

Tamién denuncia que se refieran "al gallego-asturiano, términu usáu pola llexislación asturiana y en consecuencia pol Gobiernu, como 'fala' y 'eo-naviego', apartándose asina de la práctica de l'Alministración nestos últimos trenta años y desoyendo al movimientu de reivindicación llingüística de la zona", y critica que se llende la oficialidá pa esti idioma al so ámbitu. "Ye afondar en qu'hai llingües y falantes de primera y de segunda. Insistimos na necesidá d'un tratu igualitariu pa esti patrimoniu llingüísticu: que tanto asturianu como gallego-asturiano sían oficiales y que depués una llei de la Xunta Xeneral fixe les zones d'usu predominante de cada llingua", demanda esti coleutivu.

Na mesma direición manifestóse ayeri la Plataforma pola Oficialidá del Gallego-asturiano, que calificó "de lamentable el tratamento que se fai d’esta lingua nel documento qu’acaba de conocerse firmao pola FSA-PSOE y IU-IX y que marca un acordo das dúas formacióis pra esta lexislatura". "Supón partir del idea de qu’hai úa lingua de primeira y outra de segunda. Anque núa lei de normalización posterior podan concretarse os ámbitos d’uso das dúas linguas, é mal empezo sentar como principio este trato desesquilibrao", espresa.

"Tamén chama el atención qu’os dous partidos, ún d’elos con muitas décadas de responsabilidades de goberno, usen dúas denominacióis pra referirse á nosa lingua y que ningúa sía a de 'gallego-asturiano', afixada na tradición filolóxica asturiana, nos estatutos del Academia de la Llingua Asturiana que ye encomendan velar por ela, nas normas ortográficas que regulan a súa escritura, nas publicacióis oficiales, en toda a regramentación lingüística dos últimos treinta anos del Goberno asturiano (Lei d’Uso, titulacióis, rexistros de capacitación del profesorao, sistema educativo, currículos, subvencióis, premios, Xunta de Toponimia, decreto de niveles de competencia d’uso...), nas ordenanzas municipales y oficinas de normalización lingüística da zona, nos informes del Conseyo d’Europa sobre el cumprimento da Carta Europea das Linguas Rexonales, etc. É úa falta de respeto á consideración da nosa lingua y úa irresponsabilidá que decidan alegremente inorar esto", añade.

Demanda de midíes concretes

Amás d'apuntar, al respeutive del anunciáu Plan de Normalización Toponímicu, que "depués de 15 años desque principió'l procesu de recuperación de la toponimia dícennos que quieren una llei p'aplicar lo que yá diz la Llei d'Usu, que lleven años ensin desarrollar", la XDLA critica que "l'alcuerdu d'investidura nun fala de la presencia del asturianu en RTPA y la necesidá d'aprobar l'alcuerdo-marcu onde s'estableza'l so papel dientro del procesu de normalización llingüística, del usu tresversal de la llingua propia en toles estayes de la Alministración autonómica, d'esparder la ufierta del Plan Pilotu del Asturianu per toles escueles, del apoyu a la industria cultural o del encaxe y la tresversalidá de les competencies de Política Llingüística dientro del organigrama del Gobiernu, que bien podría pasar a ser una viceconseyería con delles direcciones xenerales". Poro, piden tanto a estes dos fuercies como a Podemos, con propuestes en materia llingüística pa llegar un alcuerdu d'investidura que "nun van más allá de les de FSA y IX", "un apoyu decidíu cola oficialidá del asturianu ensin más añedíos, respetu a los falantes de gallego-asturianu y un compromisu tresversal cola normalización llingüística. Un compromisu que s'ha espeyar al traviés de midíes concretes y ambicioses, non a la espera de lo que vaigan votar terceros".

Contador Estadistiques