Asturies pela Izquierda y FSA-PSOE alcuerden desendolcar un Plan de Normalización Toponímica

|
Asturies pela Izquierda y FSA-PSOE alcuerden desendolcar un Plan de Normalización Toponímica

Adrián Barbón va ser l’únicu candidatu nel Plenu d’Investidura del xueves a la presidencia del país, tres la decisión de la popular Teresa Mallada de nun presentase. La FSA-PSOE llegó a un alcuerdu con Asturies pela Izquierda, qu’inclúi un Plan de Normalización Toponímica, p’asegurar el so apoyu na votación del vienres.

Esta mañana la coalición ente Izquierda Xunida (IX) y Izquierda Asturiana (IAS) fixo pública una declaración conxunta colos socialistes pa favorecer un Gobiernu d’izquierda n’Asturies. El documentu recueye como prioridaes responder a retos de la industria, l’emplegu y la investigación, asina como otros de refuerciu de servicios como’l de 0 a 3 año o aiciones pa la igualdá y contra la violencia de xéneru, una llei de derechos vitales básicos o a la reforma del Estatutu pa declarar la oficialidá.

No que se refier a lo llingüísticu, el testu apunta que “les fuercies polítiques que soscribimos esti alcuerdu comprometémonos a buscar los apoyos necesarios p’alcanzar una reforma del Estatutu d’Autonomía que permita establecer la oficialidá de la llingua asturiana, y de la fala o eo-naviego nel so ámbitu territorial, tanto pa garantizar la conservación d’ún de los más importantes patrimonios culturales de los que gociamos como pa reconocer los derechos lingüísticos de los y les falantes”. Tamién apunta que “s’aprobará un Plan de Normalización Toponímica mediante alcuerdos con toles alministraciones, incluyíes les estatales, que permita la utilización de los topónimos oficiales”.

Negociación con Podemos

Con Podemos, mientres, la FSA sigue en negociaciones. La formación morada presentó ayeri a los socialistes un documentu con propuestes p’apoyar la investidura de Barbón en 13 aspeutos.

Nel que se refier a ‘Rexenaración democrática y midíes de contención del gastu’, inclúi la reforma del Estatutu d’Autonomía “a iniciar en setiembre del 2019” pa incluyir supresión d’aforamientos, la oficialidá y l’aumentu de competencies. Colos votos de Podemos, sumaos a los del so partíu y Asturies pola Izquierda, Barbón saldría escoyíu presidente na primer votación, prevista’l vienres, al algamar la mayoría absoluta necesaria.

Nel casu de nun llegar a un alcuerdu cola formación liderada por Lorena Gil, el socialista debería esperar al llunes pa ser investíu, cuando-y serviría la mayoría simple. Mañana, a les 10 hores, va comenzar el Plenu cola intervención de los candidatos, esto ye, Barbón tres la decisión final de Mallada de nun presentase, pa siguir al día siguiente cola de los voceros de la oposición enantes de la votación.

Na semeya, Barbón na 'Carpa de la Palabra' de la 'Semana Negra' el llunes, onde acudió a presenciar l'alderique ‘Les oportunidaes de la oficialidá pa la industria cultural d’Asturies' entamáu pol so partíu.

Contador Estadistiques