La versión 10.0 del cliente de corréu electrónicu Thunderbird yá ta disponible n'asturianu

L’equipu de traductores de software llibre n’asturianu, Softastur, completó la torna del cliente de corréu multiplataforma Thunderbird na so edición 10.0. Esti programa ye creación de la Fundación Mozilla, autor tamién del restolador Firefox.

La versión 1.0 de Thunderbird, asoleyada nel 2005, incorporaba per primer vez l’asturianu gracies a l’esfuerzu de los componentes de Softastur. Agora, siete años depués y tres doce meses de trabayu, los usuarios asturianos pueden disfrutar d’una versión moderna d’esti cliente de corréu electrónicu na so llingua que se suma al Evolution, yá disponible n’asturianu, “cola diferencia de que Thunderbird ta disponible pa los sistemes GNU/Linux, Mac OS y Windows, lo que facilita el procesu de migración de sistemes privativos a sistemes llibres y completamente n'asturianu como seríen los casos d'Ubuntu o Debian”, según espliquen dende esti coleutivu.

Les persones interesaes en facer usu de Thunderbird en llingua asturiana pueden descargar el programa de baldre na web de la Fundación Mozilla.