La ultraderecha truña contra l'asturianu: "ye una farsa historicollingüística"

Ana Vanessa Gutiérrez, dende’l domingu conseyera de Cultura, Política Llingüística y Deporte, intervieno per primer vez en Plenu na Xunta Xeneral. Asina respondió al diputáu de VOX, Javier Jové, una entruga sobre “cuála ye la llingua materna de los asturianos”.

“Cuando se fala de llingua materna fálase de la primer llingua qu’aprende un ser humanu na infancia y que va servir como ferramienta natural de pensamientu y de comunicación”, arrancó Gutiérrez, “ye la primer llingua d’aprendizaxe, la que se tresmite xeneración a xeneración, na que s’empieza a conocer el mundu, na que se comunica como mayor espontaniedá y fluidez. Y finalmente na que la persona siente como propia y cola s’identifica culturalmente y cola comunidá”.

Ye por esi motivu “polo que ye importante saber lo que piensa la propia comunidá sobre la llingua de la so infancia y pa eso contamos n’Asturies coles encuestes sociollingüístiques que dende’l 1991 vien faciendo’l Gobiernu d’Asturies o l’Academia de la Llingua Asturiana”. Nesti puntu fixo referencia a la del 2021 sobre l’Eo-Navia, qu’afita que “de la población encuestada un 46,3 por ciento reconoz l’eonaviegu como llingua materna, el 28 por cientu’l castellanu, el 17 les dos llingües y un 9 otra llingua diferente d’éstes”.

“Coincidimos los dos na definición de llingua materna, pero a partir d’ehí nun coincidimos en nada más”, replicó Jové, porque eses encuestes que vusté me pon tien la mesma credibilidá que les de Tezanos”. Depués de señalar “que güei nun hai nada más revolucionariu que defender lo obvio”, como que “dos más dos cuatro, que sólo hai dos sexos y que les moces nun tienen pilila”, el diputáu ultraderechista añadió que “la llingua materna de los asturianos ye l’español y non esa farsa de la llingua que nos quieren facer pasar como la llingua que falaben Adán y Eva y qu’amás ye un auténticu peligru pa la permanencia del tesoru de los bables”.

Jové citó na so intervención a Gustavo Bueno y criticó que les actividaes del Día Internacional de la Llingua Materna, que se celebra mañana, asina como los materiales pa la escuela, foran n’asturianu, y aseguró que “l’español foi espulsáu, escluyíu; nun esiste l’español pa ustedes”. Na parte final, acusó al Gobiernu d’emburriar a les moces y mozos “a acabar abandonando l’español y entregase a la farsa historicollingüística que ye la llingua”.

“Namái hai qu’escuchar a los asturianos pa saber lo que piensen”

“Nun podemos naide arroganos dicir cuála ye la llingua materna de les persones”, retrucó-y Gutiérrez, “porque son les persones les que pueden definir cuála ye la so llingua de la infancia, la de los padres, cuála ye cola que se sienten indentificaos. Arrógase usté dicir que la llingua del cien por cien de los asturianos ye l’español y siento dici-y que serán los asturianos los que lo tengan que dicir, como faen neses encuestes sociollingüística”.

Nesti puntu, apuntó que na última fecha hasta’l momentu, la de los ámbitos urbanos encargada pola ALLA, “más del 63 por cientu de les persones encuestaes manifiesten que-yos gustaría que los sos fíos pudieren dominar l’asturianu y un 96 por cientu manifestó l’aspiración a un futuru billingüe p’Asturies. Namái hai qu’escuchar a los asturianos pa saber lo que piensen y en qué llingua piensen”.

Animó a los diputaos de VOX a participar nes actividaes previstes pol Día Internacional de la Llingua Materna y, añadió, “permítame tamién nesti día los anime tamién a poner en práutica un verbu n’asturianu, que ye la mio llingua materna, que ye’l verbu ‘sentir’, que per un llau ye’l verbu del amor, porque trata de pone-y corazón y sensibilidá a la vida propia y a l’ayena, y per otru llau tamién significa escuchar, que nel fondu, pola atención qu’implica, tamién vien a suponer sensibilidá y corazón. Sintamos l’asturianu más, que nun lo hai más respetuoso, que ye lo qu’usté pidía, y más humanu”.

Na semeya, los cuatro diputaos de VOX, Carolina López Fernández, Javier Jové, Sara Concepción Álvarez Rouco y Gonzalo Centeno nun momentu de la respuesta de Gutiérrez.