La situación del castru Punta'l Castiellu sigue esmoleciendo

La Lliga Celta d'Asturies y l'Asociación Cultural El Curbiru entamen una concentración y visita al xacimientu asitiáu en Podes.

"Dende hai más d’una década diversos coleutivos, asociaciones y un partíu políticu denuncien la situación d’emerxencia d’esti xacimientu ensín que, hasta'l momentu, l’Alministración del Gobiernu d’Asturies faiga daqué al respeuto pa solucionar esta situación, la d’erosión progresiva del castru por aiciu de l’aición del mar, que devengará na pérdida irrecuperable d’elementos arqueolóxicos qu’entovía tan ensín estudiar, valorar y catalogar", afirma Fernando Morán, presidente de la Lliga Celta d'Asturies sobre'l castru de Punta'l Castiellu. Esti coleutivu diz tener constancia de la presentación de proyeutos privaos autofinanciaos "p’actuar d’emerxencia, nun sector determinau del castru mui afeutau pola erosión y los argayos al mar, pa facer una recoyída d’elementos arqueolóxicos y proceder al so estudiu pa evitar la so desapaición ensín que pudieran estudiase enantes", que recibieron el refugu del Executivu.

"Lo peor de too esto, ye que con ciertes midíes cencielles ya non mui costoses podría evitase qu’Asturies perdiera una parte importante del so patrimoniu hestóricu-cultural comu sedría cubrir con tierra vexetal los cortes accesibles (y facer una valoración del que tien un acceso más peligrosu) ónde caen los niveles arqueolóxicos na parte con más riesgo de ser argayada’l mar", apunta Morán, que reclama a la Conseyería d'Educación y Cultura "que tome midíes con respeutu al caltenimientu del castru Podes de manera que se garantice la so proteición cola mayor urxencia posible".

Les dos organizaciones convocantes llamen a participar, tanto a ciudadanos como a partíos políticos, asociaciones y instituciones, nuna concentración esti domingu, a les 11.30 hores del aparcamientu del Cabu Peñes, que va completase con una visita al castru, el segundu mayor costeru depués del xixonés de la Campa Torres.