Esmolecimientu pola situación d’abandonu y de riesgu que vive’l castru Punta’l Castiello

|
Esmolecimientu pola situación d’abandonu y de riesgu que vive’l castru Punta’l Castiello

La Lliga Celta d’Asturies y a l’Asociación Cultural El Curbiru de Bañugues demanden a la Conseyería d’Educación y Cultura una actuación urxente nel castru Punta’l Castiello, en Podes. El so asitamientu, frente a la mar, fai más necesaria la toma de midíes.

Según esplica la organización que trabaya nel afondamientu nel estudiu y na conocencia de los raigaños celtes de la cultura asturiana, “el castru de Podes ye'l segundu mayor castru costeru ástur depués de la Campa Torres (Xixón)”, a lo qu’añade nun comunicáu diferente El Curbiru que ye “ablucante pol so asitiamientu, la so configuración y les sos midíes. Caltién entá reconocibles les sos estructures defensives, muries y fosos, y supónse-y una cimera relevancia económica debida a la so actividá minera. El so estudiu allargaría de xuru una conocencia perrelevante”.

Esti patrominiu, sicasí, ye escaecíu pola Alministración. Esta asociación cultural afirma que “fai un año presentóse a la conseyería un proyeutu d'escavación d'urxencia, que dirixiría'l doctor n'arqueoloxía Alfonso Fanjul, que s'ofreció tamién pa guetar y guarnir la financiación”. Por el contrario, refugóse, “dexando pa prau’l futuru” del castru. “Nunsabemos escontra qué razones pudo topetar y escarrilar la necesidá y la urxencia del estudiu”, añade.

“Lo peor de too esto ye que con ciertes midíes cencielles yá non mui costoses podría evitase qu’Asturies perdiera una parte importante del so padremuñu hestóricu-cultural, como sedría cubrir con tierra vexetal los cortes ónde caen los niveles arqueolóxicos na parte con más riesgo de ser argayada al mar”, asegura la Lliga Celta d’Asturies. Por estos motivos los dos coleutivos esixen a la conseyería una actuación urxente nel castru.

Amás, “El Curbiru quier facer un llamamientu a la sociedá asturiana pa desixir a l'Administración un camudamientu de la so actitú que dexe estudiar y evaluar el castru anantes que sufra un mayor esbarrumbamientu. Talamente pidi a los grupos de la Xunta Xeneral un pronunciamientu qu'emburrie a l'Alministración per esi camín”. D’igual forma, anuncia que va participar na visita guiada al castru Punta’l Castiello de la Lliga Celta d’Asturies prevista pal día 27, la segunda qu’entama esta organización tres la celebrada n’avientu l’añu pasáu.

Contador Estadistiques