La propuesta lliteraria, musical y audiovisual ‘A luz, Orión e a nova luz’ preséntase n'A Veiga na iniciativa Xuntoiro

|
César Álvarez, Antón García, Abel Pérez y Arantxa González presentación Xuntoiro

A Veiga va acoyer los dos sábados vinientes Xuntoiro, un alcuentru cultural alredor del gallego-asturiano que va dedicar la primer xornada al públicu adultu y la segunda, a les neñes y neños. Nel marcu del mesmu va presentase la propuesta lliteraria, musical y audiovisual ‘A luz, Orión e a nova luz’ que Miguel Rodríguez Monteavaro preparó na Residencia Literaria 1863 d’A Coruña gracies a la beca 'Asturies'.

Dividíu en dos partes, un poemariu y una pieza audiovisual pa llevar al escenariu, esta obra ponse n'escena oficialmente per primer vegada esti sábadu a les 19.30 hores na Casa da Cultura da Veiga. "Ten como obxetivo a visualización del contacto entre a poesía y as formas novas d’espresión audiovisual del siglo XXI", espliquen dende la Conseyeiría de Cultura, Política Llingüística y Turismo, qu'organiza Xuntoiro.

Rodríguez Monteavaro escribió la mayor parte del mismu nel mes d'estancia de la Residencia Literaria 1863, l'avientu pasáu, gracies a la ‘Beca Asturies de Lliteratura Asturiana en Residencia’, qu'esti añu va disfrutar Pablo X. Suárez. Ufre 31 díes a autores n’asturianu o gallego-asturiano pa la creación lliteraria nun contestu afayadizu al empar que da la oportunidá de vivir la vida cultural d’A Coruña.

Paséu lliterariu per la ría del Eo

Xuntoiro apuerta a la vida cultural del occidente del país pa “xuntar propostas lliterarias, musicales y escénicas qu’amostran a vitalidá creativa d’esta llingua y forman parte imprescindible del texido cultural y social da zona”. Col nome de ‘Riada Literaria’, esta primer xornada va entamar a les 11.45 hores na Casa Cultura cola presentación del llibru ‘Contos eonaviegos’ editáu con motivu de la XLIII Semana das Lletras Asturianas y la mesa redonda ‘A narrativa eonaviega’, moderada por Ricardo Saavedra, na que participen Rafael Cascudo, Emma Méndez y Christian Lanza.

Yá de tarde, a les 15.30 hores va celebrase un paséu lliterariu en llancha pela ría del Eo nel que van tomar parte la impulsora de la Residencia Literaria 1863, la poeta gallega Yolanda Castaño; Sergio Gutiérrez Camblor; Rodríguez Monteavaro; Belén Rico Prieto; Carmen Siñeriz; y Ugia Pedreira. La salida va ser n’As Figueiras y ye necesario inscripción previa, nel corréu electrónicu xuntoiroccidente@gmail.com, al ser les places llendaes.

Va poner el ramu a la xornada la presentación de ‘A luz, Orión e a nova luz’ nel Auditorio Félix Menéndez de la Casa Cultura, anque l’actividá va siguir el sábadu siguiente, 3 d’avientu. Nesti casu los protagonistes van ser les neñes y neños.

‘Není@s’

Baxo’l nome de ‘Není@s’, va tener una sesión pela mañana, a les 11 hores, col cuentacuentos de títeres ‘Os colores’ y los talleres ‘A vida das nosas bolas’, pa lo que tamién ye necesario inscribise nel corréu del Xuntoiro. A les 12.30 hores, mentes, va representase la obra de teatru ‘As galochas boleiras’.

Yá de tarde, va desendolcase la segunda sesión dende les 17 hores col cuentu participativu ‘As mías pitas’, sesiones nueves del taller, la creación de teatru de papel ‘A nena dos gorrióis’ y una visita guiada a la esposición ‘Nía’. El grupu musical Albióis, pa pesllar, va repasar la música editada en gallego-asturiano a les 19.30 hores nel Auditoriu Félix Menéndez.

Na semeya, l'alcalde César Álvarez; el direutor xeneral de Política Llingüística, Antón García; Abel Pérez, miembru de Mialma Produccióis Creativas; y Arantxa González Montell, conceyala de Cultura, Comercio y Turismo, ayeri de tarde na presentación de Xuntoiro na Casa Conceyo da Veiga.

AdxuntuTamañu
Image icon Programa Xuntoiro782.71 KB
Contador Estadistiques