Miguel Rodríguez Monteavaro presenta en Xixón l'espectáculu 'A lluz, Orión e a nova lluz'

Llueu d'una primer puesta n'escena en Bual y A Veiga, el Teatru de la Llaboral acueye esta propuesta lliteraria, musical y audiovisual.

Esta tarde va poder vese en Xixón per primer vegada en tou'l so esplendor l'espectáculu en gallego-asturiano 'A lluz, Orión e a nova lluz’ que Miguel Rodríguez Monteavaro preparó na Residencia Literaria 1863 d’A Coruña n'avientu del 2021 gracies a la primer edición de la ‘Beca Asturies de Lliteratura Asturiana en Residencia’. El bualés, pa desendolcar esti proyeutu lliterariu, cuenta col sofitu d'Andrés Rodrigues na parte musical, na que xune instrumentos tradicionales como la gaita o la percusión con sintetizadores analóxicos y electrónicos, y del artista gráficu Iván Torres, encargáu de crear les imáxenes qu'acompañen les construcciones poétiques del autor.

Los trés artistes tuvieron trabayando estos díes últimos na preparación d'esti espectáculu nuna sala de la Llaboral gracies a una Residencia del Programa d'Artes Escéniques del Centru de Recursos Escénicos del Principáu d'Asturies. Nel mesmu faise una revisión de la historia del mitu clásicu d'Orión, pa lo qu'introducen elementos contemporáneos.

La estrena de 'A lluz, Orión e a nova lluz’, que va saltar les llendes d'Asturies en feches próximes, va ser a les 20 hores. Les entraes tán a la venta a un preciu de 10 euros.