La oposición vota en bloque contra’l proyeutu de consolidación del castru de Chao Samartín

|
Concha Masa reducida

La Xunta Xeneral aprobó una moción d’Izquierda Xunida (IX) qu’esixe al Gobiernu la revisión del proyeutu de consolidación del castru de Chao Samartín impulsáu pol Conceyu de Grandas col preste de Patrimoniu. La FSA quedó sola defendiéndolu.

PP, Podemos y Foro, esto ye, la totalidá de la oposición, posicionáronse en contra d’unes obres valoraes en mediu millón d'euros que podríen tener efeutos  irreversibles nel castru y que consisten na construcción d’accesos y nel llevantamientu d’un centru d’interpretación en terrenos non escavaos dafechu,  polo que podríen abellugar restos arqueolóxicos, según alerta IX. La moción aprobada insta al Conseyu de Gobierno a recoyer memories y informes preceutivos de profesionales especializaos na conservación, restauración y investigación arqueolóxica d’ámbitu protohistóricu y antiguu al oxetu de valorar el ‘Proyeutu de consolidación del xacimientu arqueolóxicu del Chao Samartín’ y a convocar al Conseyu de Patrimoniu Cultural d’Asturias pa que, nel so casu, y teniendo en cuenta los informes que s’elaboren, proceda a la revisión del alcuerdu d’avientu del 2016 pol que s’autorizaron les obres.

La diputada Concha Masa pidió responsabilidá a Genaro Alonso, conseyeru d’Educación y Cultura, énte l’alarma xenerada ente autoridaes científiques y especialistes castreños y solicitó que se paralicen les obres. “Esti patrimoniu, que presenta un panorama históricu esceicional na historia de la comunidá autónoma ye una gran xoya y val más aplazar la obra un tiempu que facela ensin garantíes suficientes”, aseguró.

La coalición entiende que la pretensión del gobiernu municipal socialista, col sofitu del Gobiernu, ye convertir el recintu “nun parque turísticu pa visitantes inorantes”. Ente los despropósitos que denuncia ta que’l proyeutu recueye llevantar les muries valtiaes por un terremotu utilizando materiales como formigón, difíciles de contrarrestar y recuperar nun futuru, o la construcción d’una rampla d’accesu o un aula d’acoyida na entrada del castru, onde entovia hai terrén arqueolóxicu fértil.

Tamién fai referencia a l’ausencia d’un estudiu d’impautu arqueolóxicu, la realización del proyeutu al marxe de los investigadores que lleven décades trabayando castru de Chao Samartín o la so proyeición ensin respetar les cartes de Cracovia o Venecia que guíen los principios internacionales pa la conservación y restauración del patrimoniu construyíu. Na sesión d’esta mañana na Xunta Xeneral, los representantes del PP, Podemos y Foro emplegaron argumentos asemeyaos a los d’IX pa esplicar la so oposición al proyeutu, mentes que la FSA defendió qu’ésti yá cuenta col sofitu de profesionales y por téunicos del ministeriu, que financia parte de los trabayos.

Na semeya, Masa mientres defendía la moción nel Plenu celebráu esta mañana.

Contador Estadistiques