Izquierda Xunida difunde trés informes que “constaten los peligros” del proyeutu de Chao Samartín

|
Chao Samartín

Fernando Carrera, Miguel Ángel López Marcos y Olga Gago son trés espertos qu’ellaboraron informes sobre’l Proyeutu de Consolidación del Xacimientu Arqueolóxicu del Chao Samartín. Izquierda Xunida afirma que los trés “constaten los peligros” de l’actuación prevista.

“Nun busca la conservación d’un xacimientu arqueolóxicu y los sos valores, sinón la simple restauración –nel so sentíu más negativu– d’unes estructures antigües”, esplica Carrera, doctor n’Historia y especialista en conservación y restauración del patrimoniu arqueolóxicu, arte rupestre y megalíticu, amás de presidente de l’Asociación Profesional de Conservadores Restauradores de España. Dende Izquierda Xunida espliquen que, al xuiciu del espertu, el proyeutu nun ye una propuesta conservadora, sinón una intervención eminentemente constructiva qu’inora fases y llectures esenciales, escaeciendo’l patrimoniu orixinal y el so cuidao.

Pa López Marcos, llicenciáu n’Arqueoloxía pola Universidad Autónoma de Madrid y diplomáu en restauración pola Escuela Superior de Conservación y Restauración de Bienes Culturales de Madrid, amás de direutor de la reconstrucción monumental de la estatuaria colosal del templu funerariu d’Amenofis III na población exipcia de Luxor, ye necesario replantegar el proyeutu pa Chao Samartín y “fuxir del manual d’obra civil; siguir los principios de reversibilidá; utilizar morteros d’eliminación fácil, al tratase de piedra d’escasa consistencia, sobre manera la pizarra; fuxir del formigón armáu y el pvc; y, en definitiva, ser respetuosu col xacimientu ensin añadíos de fábriques nueves que nada nun tienen que ver col orixinal en cualquiera de les sos fases. Entender el xacimiento como ye y respetar si hai restos de movimientos sísmicos d’época”.

Pela so parte, Gago considera que “la falta de rigor traduzse nun plan d’intervención desmidíu y non afayadizu pal castru. Ta obviándose la fraxilidá y el caráuter non renovable del patrimoniu arqueolóxicu; la propuesta nun tien marcha atrás. Plantéguense soluciones que conlleven la destrucción parcial del bien”. La llicenciada en Restauración pola Facultad de Bellas Artes de la Universidad Complutense de Madrid y doctora n’Arqueoloxía Histórica pola UNED, onde desarrolla una tesis doctoral sobre les pinturas murales del castru de Chao Samartín, afirma que “les buelgues del terremotu nel castru constitún de por sí restu arqueolóxicu y han ser respetaes como cualquiera de les estructures materiales esistentes”.

El Proyeutu de Consolidación del Xacimientu Arqueolóxicu del Chao Samartín ta impulsáu pol Conceyu de Grandas de Salime col sofitu del Gobiernu. El pasáu mes de marzu, la Xunta Xeneral refugólu colos votos de tola oposición.

Contador Estadistiques