La meyor noticia d'esti añu tamién sal del Congresu

Al igual que nel 2020, de la Cámara Baxa llegó la meyor anuncia pal idioma según la votación entamada por Iniciativa pol Asturianu.

'El Congresu de los Diputaos sofitó’l puntu de la PNL que pidía la oficialidá de la llingua asturiana' ye la 'Meyor noticia pal asturianu en 2021'. Resultó la opción con más apoyos ente los 39 propuestes feches pola organización que trabaya pola normalización del idioma ente les munches anuncies positives que rexistró l'idioma l'añu pasáu.

Asturies.com cubrióla'l 11 de marzu baxo'l titular 'El Congresu encamienta al Gobiernu a “impulsar y apoyar” una reforma estatutaria n’Asturies pa declarar la oficialidá'. "Finalmente la PNL sobre la Realidá Plurillingüe y Igualdá Llingüística votóse por puntos, lo que permitió que saliera alantre’l que se refería a la oficialidá del asturianu y del gallego-asturiano. El Congresu encamienta asina al Gobiernu a “impulsar y apoyar” una reforma estatutaria n’Asturies pa facer oficial les dos llingües propies del país", entamaba la información.

Ye'l segundu añu nel que la 'Meyor noticia' sal del Congresu, yá que la escoyida polos votantes nel 2020 foi 'Inclúise per primer vegada una partida pa l’Academia de la Llingua Asturiana nos Presupuestos Xenerales del Estáu'. "Tamos nun momentu de bones noticies pal idioma y creemos qu’hai aprovechar esta circunstancia y dar nesti 2022 la meyor noticia posible pal idioma que ye la oficialidá", rescampla Iniciativa pol Asturianu.

Les otres más destacaes

Con una diferencia mui curtia, quedó posicionada, en segundu llugar, la noticia 'Ésitu de la manifestación pola oficialidá n’Uviéu', mentes que tercera resultó 'Pumares dio’l sí a la reforma y a la oficialidá con condiciones'. La torna de la Biblia al asturianu y el manifiestu universitariu internacional pola oficialidá d’Iniciativa pol Asturianu foron les siguientes con más sofitos.

El tratamientu n'Asturies.com

La 'Meyor noticia pal asturianu en 2021' tratóse asina, nos díes previos y posteriores, nesti diariu dixital:

• 'El Congresu encamienta al Gobiernu a “impulsar y apoyar” una reforma estatutaria n’Asturies pa declarar la oficialidá'

Díes previos

• El Congresu va aldericar sobre la oficialidá del asturianu y la igualdá llingüística
• “Esta PNL tamién intenta que’l Gobiernu encamiente a la Xunta a qu’entame la reforma del Estatutu pa reconocer la oficialidá”, afirma en Madrid Llera
• “Son les nueses llingües les que se ponen en riesgu, y dalgunes, como l’asturianu o l’aragonés, con muncha más gravedá”, denunció Aizpurua nel Congresu
• “Sorprendiónos el tonu del PSOE”, señala Llera

Díes posteriores

• El PSOE asume la postura de la FSA y vota a favor de la oficialidá
• “Hai qu’abrir cuanto primero esi alderique imprescindible, calmáu y asosegáu sobre la reforma estatutaria”, demanda Llera
• “Abrimos una ventana, pero queremos abrir toles ventanes”, apunten les entidaes que presentaron la PNL nel Congresu