Iniciativa busca la 'Meyor noticia pal asturianu en 2021', añu de munches anuncies positives

|
Meyor Noticia pal Asturianu 2021

La votación va tar abierta hasta'l vienres.

Iniciativa pol Asturianu vien dende'l 2013 escoyendo cuála foi la meyor noticia del añu. Entráu'l 2022, ufre 39 opciones a los ciudadanos, que pueden votar hasta 15 opciones per Internet al traviés d'esti formulariu, pa decidir la 'Meyor noticia pal asturianu en 2021'.

"Faciendo un repás a les bones noticies pal idioma nel añu 2021, dímonos cuenta de que l’añu pasáu foi ún de los que más noticies positives tuvo pal asturianu, lo que tamién ye una bona anuncia", espresa Iván Llera, presidente d'esti coleutivu. Nel 2020 la ganadora foi la inclusión d'una partida pa l'Academia de la Llingua Asturiana nos Presupuestos Xenerales del Estáu.

Llera apunta que "con esta campaña pretendemos facer llegar a los asturianos y a les asturianes delles bones noticies pal nuesu idioma. Queremos que la sociedá seya partícipe tamién d’estes bones noticies pa la llingua asturiana". Ente toles persones qu'emitan el so votu van sortiase llibros.

Na semeya, dalgunes de les opciones propuestes

Contador Estadistiques