La lliteratura en gallego-asturiano cuenta con dos concursos nuevos

El xueves abrióse’l plazu de receición d'obres pa dos nuevos concursos lliterarios en gallego-asturiano. Son el Premio Ría del Eo de Poesía en Galego-asturiano, qu’entama’l Conceyo da Veiga, y el Quiastolita de Lliteratura Infantil, de la Fundación Parque Histórico del Navia.

La Casa Conceyo da Veiga acoyó la presentación de dambos concursos, actu que contó cola asistencia del alcalde César Álvarez Fernández y de la primer edil d’El Franco, Cecilia Pérez Sánchez, amás del direutor xeneral de Política Llingüística, Antón García. Dos premios lliterarios nuevos, ún de poemes destináu a un públicu adultu y otru de testos en prosa pa neñes y neños, con una recompensa caún de 1.500 euros pal ganador.

Nel casu nel de poesía, el máximu de creaciones almitíes por persona ye de 3, con tema llibre. Les obres han ser en versu, orixinales y inédites, con un mínimu de 250 versos mecanografiaos a doble espaciu, con páxines numberaes y lletra Times New Roman de 12 puntos.

El plazu pa entregar les creaciones fina’l 31 d’agostu, teniendo que presentales na Casa Conceyo con 3 copies con un sobre zarráu colos datos personales. El fallu del concursu va tener llugar en setiembre.

Capacidá pa coneuta col públicu infantil

Nel Premio Quiastolita de Lliteratura Infantil pueden participar testos apropiaos pa llectores d’edá infantil, de temátiques diverses. Tamién ye posible presentar trés obres por persona, con un máximu de 25 fueyes de llargor caúna.

La xente interesao ha d’unviar les sos creaciones a la direición de corréu electrónicu administracion@parquehistorico.org ensin firma nin alcuñu, col testu ‘Premio Quiastolita de Lliteratura Infantil’ nel asuntu. Nun documentu Word anexu ha dir la obra y nun segundu, los datos personales.

El xuráu va tener en cuenta a la hora de valorar los trabayos presentaos la creatividá, la calidá y la capacidá pa coneutar col públicu infantil. El día últimu pa unviar les obres ye tamién el 31 d’agostu.

Na semeya, Álvarez Fernández, García y Pérez Sánchez.