Selmana de les Lletres Asturianes

La gala del Premiu al Meyor Cantar va poder siguise en diferío en TPA

|
Cartelu XII Premiu al Meyor Cantar Camaretá

Rodrigo Cuevas, Silvia Quesada, Mapi Quintana y Slum Suit van defender esti vienres nel Fantasio de Navia, a puerta pesllada poles restricciones pa frenar la pandemia de COVID-19, los sos temes finalistes nel XII Premiu al Meyor Cantar, que gana esti añu l’apellíu ‘Camaretá’. La gala va poder siguise en TPA’l sábadu en diferío.

Les cámares del ente públicu de comunicación van ser les úniques testigues de les actuaciones. Les midíes tomaes pola delicada situación sanitaria del país impide l’accesu del públicu que, sicasí, va tener la oportunidá de disfrutar de les pieces que pasaron el corte del xuráu dende los sos llares.

Los cuatro temes qu’aspiren a ser el meyor cantar n’asturianu o gallego-asturiano del 2019 y la primer metá del 2020 son ‘Rambalín’, de Rodrigo Cuevas; ‘La mesma revolución’, de Silvia Quesada; ‘Cantar pa durmir un ninín’, de Mapi Quintana; y ‘L’espeyu’, de Slum Suit. Tamién van actuar Lafu y Rebeca, ganadores de la edición anterior con ‘Les sombres de la yerba’, mientres el xuráu decide’l merecedor del gallardón.

La gala del Camaretá, nome qu’incorpora esti premiu n’homenaxe a la que foi la primer agrupación cultural y musical del Surdimientu, va principiar a les 20 hores d’esta tarde. La emisión en TPA de mañana ta anunciada pa les 22.35 hores, a la que va siguir un resume de les onde ediciones anteriores.

Contador Estadistiques