“La esposición sigue la filosofía de Dixebra y ta pensada pa un públicu amplio”, apunta Elipe

La muestra ‘Dixebra. XXXV años de rock n’asturianu’ inauguróse en Xixón, onde va poder visitase hasta’l 9 de xineru. “La esposición sigue la filosofía de Dixebra y ta pensada pa un públicu amplio”, apunta’l cantante Xune Elipe, que presenta materiales diversos, semeyes, un videu y seis paneles que cuenten el contestu nel que nació la banda.

La Fundación Municipal de Cultura, Educación y Universidá Popular, al traviés de la Oficina de Normalización Llingüística de Xixón, y la Direición Xeneral de Política Llingüística collaboraron nesta iniciativa de la banda pa conmemorar los sos 35 años de vida. “María Xosé”, responsable del SNL, foi la primer persona cola que contauté y falé de la idea”, rescampló Elipe, qu’agradeció l’apoyu mostráu dende’l primer momentu por estes trés instituciones.

“Too esto ye’l mio archivu” señaló’l cantante, que confesó que guarda “cuatro veces más” en casa. “Caltenemos materiales y elementos del añu 87, del primer añu, porque pensaba que díbemos dar trés o cuatro concertinos y quixi guardar aquelles coses pa poder dicir a la mio fía o a los mios fíos que tuvi un grupu de rock”, bromió, pero “aquellos cuatro primeros cartelos y piḥadines que guardaba de recuerdu convirtióse en 35 años y una montonera de material” que s’espón na sala númberu 3 del Centru de Cultura Antiguu Institutu.

A partir de dichu material naz ‘Dixebra. XXXV años de rock n’asturianu’, muestra que “sigue la filosofía de Dixebra”. “Nun queríemos una esposición que fora la típica pa única y esclusivamente fans de la banda. Paco Álvarez describióno como los xuglares modernos d’Asturies porque contábemos la realidá d’Asturies al traviés de les nuestres composiciones musicales. Eso ye lo que quiximos facer cola esposición”, resumió.

Asina, creáronse seis paneles diseñaos por Eduardo Carruébano con conteníos d’Elipe “nos que namás al final se fala de Dixebra”. Nellos cuéntase “cuál foi’l constestu nel que surdió una banda como Dixebra nun llugar como Avilés; cuála foi la reinvindicación llingüística a lo llargo de tou esti tiempu, en qué ambiente tuvimos que desenvolver munchos años el nuesu llabor como músicos al traviés de la zona conflictiva; cómo foi’l surdimientu del rock n’asturianu cuando namás había una banda, que yéremos nosotros, una banda en toles aceiciones; la rellación que tenemos cola lliteratura en llingua asturiana asturiana a lo llargo d’estos años, que foi algamando un nivel al altor de cualquier otra lliteratura europea, y que rellación tenía Dixebra con too ello; y, por último, cómo al traviés de la música y la reivindicación llingüística, el nome d’Asturies foi internacionalizándose”.

Fecho a mano

Trés vitrines “con coses más llamatives” formen tamién parte de la muestra. “Hai munchu material de los primeros momentos de Dixebra y creo qu’eso a la xente más nuevo, más mozo, avezao agora a les teunoloxíes nueves, a remanar ordenadores, va llama-y l’atención. Ye too artesanía, pura y dura, materiales fechos mano. Hasta les chapes, de principios de los 90, tán feches a mano, con un fotocopiadora y una máquina díbemos una a una faciéndoles”, tamién “les pegatines y los cartelos”, rellató.

Una esbilla de semeyes y un videu con media docena de conciertos “dende l’añu 92, que foi la primer vez que salimos a tocar a Euskadi, primer conciertu qu’hai grabáu, hasta l’actualida” completen la esposición, que tamién cuenta con un programa de mano “que cuasi ye una pieza de coleicionista. Tien “16 páxines y una montonera de material gráficu” y inclúi un testu de Paco Álvarez y otru del propiu Elipe, “amás d’otros xenéricos sobre la historia de Dixebra”.

Y como complementu, el conciertu previstu na sala Acapulco'l vienres 30 a les 21 hores. Una actuación con preciu de 12 euros (15 na puerta) y entraes a la venta nel Trisquel (Xixón), L'Esperteyu (Uviéu), El Cafetón (Avilés) y na rede na plataforma Woutick!.

L’horariu de visita de ‘Dixebra. XXXV años de rock n’asturianu’ ye de 17.30 a 20.30 hores, de llunes a vienres; de 12 a 14 y de 17.30 a 20.30 hores, los sábados; y de 12 a 14 hores, los domingos y festivos, hasta’l día 9 de xineru. Depués la intención de Dixebra ye llevala a otros conceyos del país, con interés de que pueda visitase n’Avilés y Corvera, onde nació la banda, y conversaciones pa que viaxe tamién a Mieres, ente otros posibles llugares.

Banda sonora de munches vides

Na inauguración de la muestra Elipe tuvo acompañáu por Antón García, direutor xeneral de Política Llingüística, y Miguel Barrero, direutor de la Fundación Municipal de Cultura. Ente’l númberosu grupu de periodistes y persones que s’averaron al actu tamién tuvo presente María Xose Rodríguez López, responsable del SNL.

García destacó los “35 años de compromisu, d’actividá y de crecimientu constante” de Dixebra, un fenómenu que calificó como “raru nel ámbitu cultural y seguramente más allá d’esi ámbitu”. “Dixebra forma parte de la mio propia cultura y de dalguna manera les canciones de Dixebra a lo llargo de toos estos años formen tamién la banda sonora de la mio vida, como la de muncha otra xente que se movió toos estos años alredor de la llingua asturiana, de la cultura asturiana y de la política asturiana”, siguió’l de Tuña, que felicitó a Xune y a la propia banda “por esi compromisu, por esa dignidá continua” y naguó por que “esta esposición sirva pa dar a conocer a la sociedá, sobre too, creo yo, ente la xente más mozo, esti trabayu fructíferu de tantos años”.

Pela so parte, Barrero apuntó que ye una muestra “que non sólo recueye la historia del grupu, sinón que tamién la pon en rellación col so contestu xeográficu, históricu y simbólicu”. Calificóla d’especial pa él “porque yo trabayé con Xune munchu tiempu” y rescampló que “tamién tien un componente xeneracional importante porque Dixebra foi parte fundamental pa la mio xeneración”.

Amás señaló que tamién “ye importante porque de dalguna manera amuesa cómo la música contribuyó a la normalización del asturianu. Siempre se fala de la lliteratura como gran elementu normalizador de la llingua, pero yo creo que la música xugó un papel igual o quiciás más importante porque ye un mensaxe más direutu no que tien que ver col usu cotidianu de la llingua. Gracies a Dixebra y a los grupos que vinieron dempués d’ellos vimos cómo la llingua asturiana podía servir pa falar de cualquier cosa”.

Na semeya, García, Elipe y Barrero frente a la parte fotográfica de la esposición.