Dixebra va despidir l'añu de 'Ente la niebla' con un conciertu en Xixón

L'actuación que la banda vien celebrando nos tiempos últimos en feches navidiegues va tener llugar nesta ocasión na sala Acapulco.

Dixebra cumplió 35 años como grupu esti 2022, nel qu'asoleyó 'Ente la niebla', un discu-llibru conceptual que cuenta y canta la historia del movimientu obreru y les clases populares asturianes nel que venía trabayando dende enantes de la pandemia de COVID-19. Un añu especial que va pesllar con un conciertu tamién especial.

Va ser el vienres 30 d'avientu a les 21 hores en Xixón, na sala Acapulco, nunes feches nos que vien entamando actuaciones nos años últimos, en parte "pa que toes eses 'leendes urbanes' que vuelven al páis estos díes puedan aconceyar con nós y recargar piles d'asturianidá coles que regresar al 'exiliu'. En feches próximes Dixebra va dar más detalles sobre preciu d'entraes y puntos de venta.