La esposición ‘Pruebes d’autor’ sobre Nel Amaro arranca en Ḷḷena’l so percorríu per Asturies

La Casa Cultura de La Pola ye la primer parada de la esposición ‘Pruebes d’autor. Les siete vides de Nel Amaro’ que s’estrenó en Mieres con motivu de la XLII Selmana de les Lletres Asturies. Coordinada por Xandru Fernández, la intención de Política Llingüística ye que visite delles poblaciones del país.

El direutor xeneral Antón García y l’alcaldesa Gema Álvarez acudieron a la presentación de l’amuesa celebrada ayeri. Ésta ta formada por material gráfico, bibliográfico y audiovisual del artista de Quentuserrón, mui venceyáu tamién al conceyu ḷḷenizu, que sirve pa repasar la so vida y obra, asina como pa conocer la dómina na que trabayó.

La esposición va poder visitase hasta’l día 30 na sala Celso Granda de la Casa Cultura nel horariu siguiente: de llunes a vienres de 18 a 20 hores y los sábados de 11.30 a 13 hores. La entrada ye llibre.

Otra instalación en Xixón

Esta amuesa nun ye la única al rodiu de la figura d'Amaro, yá que LlABoral Centru d'Arte y Creación Industrial acueye tamién dende la Selmana de les Lletres la instalación ‘Nel Amaro-Postal/Visual’, coordinada d'igual forma por Fernández. Ésta centrase na faceta más visual del mierense y va tar abierta al públicu finalmente hasta'l 10 de xunetu depués de vivir una ampliación, yá que nun primer momentu taba prevista hasta'l día 26.

Tamién d'entrada llibre, pue visitase de de miércoles a sábadu, de 11 a 19 hores, depués d'entrar a valir l'horariu de branu de LlABoral.