La esperada vuelta del Tenis Playa de Lluanco llega nueve años depués cola presencia de Carreño

|
Tornéu Tenis Playa de Lluanco

2020 yera la fecha marcada pa la vuelta del Tenis Playa de Lluanco, pero la llegada de la pandemia imposibilitó la so celebración. Esti martes, nueve años depués de la edición última, la sablera de La Ribera recupera esta competición única que s’allarga hasta’l vienres y na que participen Pablo Carreño y Tommy Robredo, últimu ganador.

El tenista catalán, yá retiráu del circuitu ATP depués de despedise esti añu nel Conde de Godó, derrotaba nel 2013 na final a Nicolás Almagro por 6-4 y 7-6(3). Esta tarde torna a garrar la raqueta sobre l’arena duro de Lluanco pa enfrentase en cuartos de final del XXXV Torneo Herrero Brigantina-Tenis Playa de Luanco Memorial Manolo Galé a Miguel Avendaño, de namái 17 años, fíu del ex tenista profesional lluanquín Juan Avendaño.

Enantes, a les 21.15 hores, otru catalán, Marc López, que sustitúi a Marcel Granollers por lesión nun hombru, que nun primer momentu reemplazaba a David Ferrer, va vese les cares col lituanu Edas Butvilas. TPA va emitir estos partíos, y los de mañana, en falso direuto dende les 22.30 hores, mentes que Teledeporte va dar les semifinales y la final.

Planelles, rival d’última hora de Carreño

El medayista olímpicu xixonés Pablo Carreño, que yá participara nes ediciones del 2007, 2008 y 2010 cuando yera adolescente, va entrar en competición mañana contra l’alicantín Gerard Planelles, que llega en relevu del so paisanu Iker Sevilla, baxa d’última hora por un tema de salú. Va ser el últimu partíu d’esta eliminatoria, yá que nun primer momentu, a les 21.45 hores, van enfrentase’l toledanu Feliciano López y el rusu Pavel Petrov.

Les semifinales tán programaes pa les 22.30 hores del xueves, mentes que la gran final va principiar a les 23 hores del vienres. Les entraes p’acceder a les graes instalaes en La Ribera tán a la venta a un preciu de 15 euros en cuartos, y de 25 pa les semifinales y el partíu decisivu, con abonos pa tol tornéu que van de los 40 a los 60 euros.

Na imaxe, ambiente en Lluanco nuna edición anterior de la competición. Semeya propiedá del Torneo Tenis Playa de Luanco Memorial Manolo Galé.

Contador Estadistiques