El Tenis Playa de Lluanco va tornar nel 2020 tres seis años de parón

Tommy Robredo foi nel añu 2013 l’últimu ganador del Tornéu Tenis Playa de Lluanco, una de les competiciones más especiales del circuitu tenísticu mundial al celebrase sobre sable duro na playa en baxamar. El vienres va dase l’anuncia nel Muséu Marítimu d’Asturies de la so vuelta a sablera de La Ribera nel branu del 2020.

Mañana, a les 11 hores, va dase a conocer nesta instalación, que nel 2016 acoyó una esposición sobre la historia del tornéu de la sablera de La Ribera, tolos detalles de la so vuelta. La convocatoria del Club de Tenis de Luanco destaca con un ‘¡Regresamos!’ y una imaxe de la pista y les graes que se llevantaben en Lluanco pal tornéu.

Dende 2014, cuando los sos responsables anunciaron el parón del tornéu por cuestiones organizatives, y a pesar de dellos intentos pa retomalu al traviés d’empreses interesaes, nun se celebra al nun llegar nunca les negociaciones a bon puertu. Agora, seis años depués de la última edición, la trentena quinta edición del Tenis Playa de Lluanco va ser una realidá pal branu del 2020 y va servir “d’homenaxe a Manuel Galé, un gran impulsor del Tenis-playa, recientemente fináu”, avancen dende la organización.

Una competición única

La playa de La Ribera acoyó dende’l 1971, y hasta’l 2013 –menos el periodu ente 1986 y 1994–, esti tornéu únicu nel mundu por disputase sobre sable duro en baxamar. Col pasu los años, la competición foi creciendo, cola instalación de graes que quedaben cubiertes pola agua cuando xubía la marea, dexando imáxenes que percorríen el mundu.

A pesar de nun ser puntuable pal circuitu ATP, son importantes los tenistes que xugaron en Lluanco y que llegaron a dexar el so nome nel cuadru d’honor del tornéu. Asina, atopamos a vencedores de la talla de Juan Avendaño, Sergio Casal, Pato Clavet, Àlex Corretja, Carlos Moyá, Juan Carlos Ferrero, l’arxentín Guillermo Cañas, Fernando Verdasco, Feliciano López o David Ferrer, ente otros.

Na imaxe, un momentu de la competición del 2011. Semeya propiedá del Tornéu Tenis Playa de Lluanco.