La emigración yá nun va tener que rogar el votu pa exercelu

El Senáu dio lluz verde por unanimidá a la reforma de la Llei Orgánica del Réxime Eleutoral Xeneral (LOREX) que desanicia’l votu rogáu impuestu nel 2011 pa la emigración. Nes eleiciones de mayu del añu qu'entra toles persones rexistraes nel censu de residentes ausentes van recibir d’oficiu la documentación necesaria.

La baxada na participación por cuenta d’esta midida, que nel so momentu namái tuvo la oposición de la diputada Ana María Oramas (Coalición Canaria) y d’IX, foi drástica, pasando del 31,88 por cientu nes Estatales del 2008 a un 3 por cientu nes autonómiques y municipales del 2019, según los datos del Instituto Nacional de Estadística (INE). Una torga que desincentivaba a munchos emigrantes a exercer el so derechu al votu.

La votación d'ayeri nel Senáu yera’l trámite últimu d’un procesu entamáu añu y mediu, polo que namái queda la so espublización nel BOE pa la so entrada a valir. D’esta forma en mayu les asturianes y asturianos nel esterior nun van tener que rogar el votu pa les eleiciones Nacionales y municipales de mayu nin pa les Estatales, que serán pa la seronda.

Amás del desaniciu del votu rogáu, la reforma del LOREX trai otros cambios como l’ampliación de 3 a 7 díes pa votar n’urna nos consulaos o la posibilidá de descargar telemáticamente les papeletes. A lo llargo de la tramitación de la norma quedaron fora demandes como la d’ERC de poder delegar el votu a una persona residente nel Estáu de la so mesma circunscripción o la de PDeCAT de permitir el votu electrónicu, opción refugada pola Xunta Eleutoral Central por falta de seguridá, lo que nun impidió que la modificación saliera alantre por unanimidá.

Na semeya, un momentu del Plenu d'ayeri nel Senáu.