La denuncia de la XDLA: en conceyos firmantes de la 'Declaración de Bimenes' "nun esisten polítiques de normalización"

La Xunta pola Defensa de la Llingua Asturiana reclama a los 40 conceyos que roblaron el documentu y a los partíos que lu sofitaron na Xunta Xeneral que pasen "de les declaraciones a los fechos".

"Nengún pero se-y pue poner al testu en cuestión al tratar la convivencia natural ente les llingües d'Asturies, señalar la importancia d'acciones de normalización que garanticen oportunidaes y desenvolvimientu, concebir la diversidá como una oportunidá, llamar al diálogu y al consensu y afitar la necesidá de la declaración d'oficialidá", apunten dende'l coleutivu, al que-y sorprende que los que tienen "la responsabilidá d'aplicar y desenvolver tolos puntos de la declaración, nun tán faciendo la parte que-yos correspuende". Esto ye, "alcaldes y presidente; y na Xunta Xeneral, diputaos y diputaes".

"Les polítiques de normalización nun esisten nos más de los conceyos firmantes y, non sólo eso, sinón que nun cumplen la llegalidá n'aspectos como l'usu de la toponimia oficial o na atención a la ciudadanía; nin siquiera tienen les webs municipales n'asturianu o en gallego-asturianu, colo fácil que ye teneles disponiendo como disponen de servicios de normalización llingüística", critiquen. Al empar, "na Xunta Xeneral vemos cómo s'aprueba un testu con unes disposiciones que nun se cumplen y se solicita la oficialidá n'abstracto cuando esa mesma representación de la ciudadanía tien les ferramientes necesaries pa impulsar una reforma estatutaria que lleve alantre la oficialidá".

Por estos motivos, la XDLA quier "facer un llamáu a la responsabilidá y la seriedá de la nuestra clas política. Yá pasó de sobra'l tiempu de les declaraciones. Ye la hora de pasar de les palabres a los fechos. Ye la hora d'impulsar el reconocimientu de los derechos y la igualdá xurídica que namás pue dar el marcu llegal de la oficialidá".