Éstos son los puntos más importante y el testu completu de la 'Declaración de Bimenes'

El documentu, al que s'adhirió la Xunta Xeneral, roblólu'l 20 de febreru en Martimporra'l Conseyu de la Rede de Normalización Llingüística.

• Convivencia con naturalidá de tres llingües.
• Importancia de desendolcar aiciones de política llingüística pa garantizar que toes tengan les mesmes oportunidaes d’usu y desenvolvimientu.
• Declaración d'oficialidá.
• Diversidá llingüística como oportunidá.
• Llamáu al diálogu y al consensu.

Declaración de Bimenes del Conseyu de la Rede de Normalización Llingüística en defensa de les llingües propues d'Asturies con motivu del Día Internacional de la Llingu Materna.

Bimenes, a 20 de febreru de 2024

N’Asturies conviven con naturalidá trés llingües: el castellanu, oficial en tol Estáu, y l’asturianu y l’eonaviegu, reconocíes y protexíes pol Estatutu d’Autonomía d’Asturies y la Llei 1/1998, de Usu y Promoción del Bable/Asturianu, respectivamente. Estes dos últimes, llingües propies d’Asturies, cuenten con un fondu arraigu na historia, na cultura y nes tradiciones d’Asturies, tresmitiéndose xeneración a xeneración como llingües d’espresión de la vida cotidiana, de la creación artística, de les relaciones ente persones y de les manifestaciones del nuestru folclore, configurando y vertebrando la identidá colectiva de les asturianes y asturianos.

Güei les tres llingües -castellanu, asturianu y eonaviegu- conviven ensin que l’usu o la promoción d’una suponga un detrimentu d’otra. Al contrario, les tres representen un valiosu patrimoniu cultural que se complementa al tiempo qu’arriquez a la nuestra sociedá, al reconocer el nuestru pasáu y al legáu recibíu y proyectalu hacia’l futuru, lo que refuerza la nuestra autoestima como pueblu que ye consciente del so valor y del so potencial. A estes llingües hai qu’añedir la presencia d’otros idiomes, tanto españoles como estranxeres, resultáu de la inmigración recién, qu’añaden capes adicionales de diversidá y riqueza a la nuestra comunidá. D’ehí la importancia de desarrollar acciones de política llingüistica que salvaguarden les nuestres llingües y que garanticen los derechos culturales de les persones.

L'oxetivu de la política llingüística y de la normalización ye garantizar que toles llingües tengan les mesmes oportunidaes d’usu y desarrollu, reconociendo’l so valor intrínsecu y la so contribución al arguyu d’asturianía. Y especial atención merecen aquelles que s’encuentren minorizaes y amenazaes, como ye’l casu de l’asturianu y l’eonaviegu.

Por ello, coincidiendo cola celebración del Día Internacional de la Llingua Materna, los conceyos miembros del Conseyu de la Rede de Servicios de Normalización, anguaño integrada por más de 40 ayuntamientos y entidaes, queremos facer una declaración de reconocimientu de les llingües propies d’Asturies por ser aquelles menos favorecíes y que más demanden de la nuestra atención. Trátase de reconocer l’asturianu y l’eonaviegu como derechos culturales inherentes, dao que la llingua materna entiéndese como un derechu a acceder y participar na herencia cultural colectiva que tanto l’asturianu como l’eonaviegu representen. Y esti reconocimientu, pa bien ser, pasa pela declaración d’oficialidá d’estos dos idiomes, pa que tengan les mesmes condiciones que’l restu de llingües oficiales d’España.

La diversidá llingüística nunca ha vese como una amenaza, sinón como una oportunidá. El plurillingüismu abre puertes, fomenta la inclusión y l’entendimientu mutuu. El respetu a les llingües d’Asturies supón un compromisu cola igualdá dientro de la diversidá y sitúa al asturianu y al eonaviegu como elementu cohesivu y distintivu de la comunidá autónoma, merecedor de protección y promoción como tesoru cultural vivu.

Asina, firmamos esta declaración faciendo un llamáu al diálogu y al consensu, pa que l'asturianu y l'eonaviegu ocupen el llugar que-y correspuende en tolos ámbitos de la vida pública y privada de la ciudadanía asturiana. Trabayemos pa que les nuestres llingües propies sigan llatiendo nel corazón d’Asturies, como símbolu de la nuesa identidá y como ponte hacia un futuru de progresu y harmonía. Habemos actuar con visión y coraxe, pa que les xeneraciones futures hereden una Asturies onde la diversidá llingüística seya de verdá celebrada como unu de los sos mayores tesoros.