La COVID-19 yá llevó la vida de más de 300 asturianos

5 persones morrieron na xornada, na que se rexistraron tamién 5 contaxos y curaciones.

Un total de 304 asturianes y asturianos perdieron la vida en dos meses por COVID-19 dende qu'Avelino Uña, salesianu de 68 años qu’exercía de xefe d’estudios nel colexu de la Fundación Masaveu y contaba con patoloxíes previes, se convirtiera nel primer fináu n'Asturies de la pandemia'l 11 de marzu. Dende entós, quitando les primeres xornaes y dalguna suelta nos díes últimos, el gotéu de muertes foi constante.

A les 20 hores d'ayeri, última actualización de los datos de la pandemia, la Conseyería de Salú confirmó 5 persones finaes, una más que'l domingu. Na xornada tamién hebo 5 positivos más por PCR tres el procesamientu de 2.743 muestres y 5 curaciones, poniendo'l total en 1.031.

El númberu total de casos deteutaos asciende a 3.226, de los que 2.351 foi por PCR y 875 por tests d'anticuerpos (9 ayeri con 1.489 pruebes feches). Na UCI hai anguaño 26 pacientes ingresaos, 3 menos que la xornada anterior, mentes qu'en planta siguen 87.