La conmemoración del 25 de mayu sigue ganando pesu nel país

Asturies celebra un añu más el 25 de mayu, una fecha escaecida per décades poles instituciones y namái recordada por dellos sectores, como l’asturianismu. L’añu pasáu, per primer vegada, el Gobiernu entamó un actu pa conmemorar la declaración de soberanía de la Xunta Xeneral nel 1808, qu’esti añu refuercia, y son munches les actividaes al rodiu d’esti acontecimientu clave na nuesa historia.

Cúmplense güei en concretu 214 años del 25 de mayu del 1808, cuando la declaración de soberanía de la Xunta Xeneral el 25 de mayu del 1808, rebelándose contra l’exércitu francés, llevó a la organización d’un exércitu asturianu propiu y al unvíu d’embaxadores a Inglaterra pa pidir sofitu na llucha contra l’exércitu francés invasor. Amás supunxo la creación de la bandera d’Asturies, similar a l’actual, que llevaba la cruz de la victoria y el lema ‘Asturias xamás vencida’.

Ésta foi la mayor herencia del 25-M y hasta’l presidente Adrián Barbón, qu’apuesta por caltener el 8 de setiembre, Día de la Santina, como Día d’Asturies, vien refiriéndose a esta xornada como Día de la Bandera. L’orixe de la bandera del país ta nun informe de Gaspar Melchor de Xovellanos a pidimientu del marqués de Camposagrado nel 1794, nel que l’ilustráu xixonés, tres analizar diferentes posibilidaes, propón tomar como símbolu’l mesmu que’l de la monarquía asturiana: la cruz de la victoria.

Na so propuesta ésta sería platiada, coles lletres alfa y omega, y con un fondu colloráu o azul. Años más tarde, tres la declaración de soberanía del 1808, la Xunta Xeneral, tresformada en Xunta Cimera, entiende de la necesidá d’adoptar un símbolu, una bandera, pa lo que toma como base la propuesta por Xovellanos, escoyendo finalmente fondu azul.

N’Asturies.com, pa conmemorar esta fecha, recuperamos dellos artículos, gráficos y informaciones que viniemos espublizando otros 25-M anteriores:

• Cuando fuimos soberanos nel XIX
• La bandera, la mayor herencia del 25 de mayu
• Los poemes de Fernán-Coronas sobre la bandera
• ¿25 de mayu, 8 de setiembre o entrambes?
• “El 25 de mayu ye una fecha claramente reivindicable por tol abanicu políticu”, apunta Zapico