La Casa de las Lenguas de la Universidá d'Uviéu retira l'asturianu de la so ufierta de 15 idiomes

La XDLA fai un llamáu al equipu rectoral nuevu "pa que dexe de vulnerar los drechos llingüísticos" na institución universitaria.

La Casa de las Lenguas de la Universidá d'Uviéu ufierta pa esti cursu 2022-2023 l'enseñu de 15 idiomes nes sos sedes d'Uviéu, Xixón y Avilés. Ente ellos nun ta l'asturianu.

En concreto, presenta 71 cursos de diferentes niveles n'alemán, árabe, catalán, chinu, francés, griegu modernu, hebréu, inglés, italianu, xaponés, llingua de signos española, portugués, rusu y ucranianu, amás de los qu'entama en castellanu pa estudiantes estranxeros. Son los mesmos que nel cursu 2020-2021 –yá nun ta disponible na rede programa del añu pasáu–, sustituyendo l'asturianu pola llingua d'Ucraína.

"Sele que sele, siguen les aiciones escontra la cultura asturiana dende que llegó'l nuevu rectoráu al mandu de la institución", denuncia la Xunta pola Defensa de la Llingua Asturiana (XDLA), qu'afala al equipu d'Ignacio Villaverde a "que dexe de vulnerar los drechos llingüísticos de la sociedá que vienen marcaos nel Estatutu d’Autonomía, la Llei d’Usu y Promoción del Asturianu y los propios estatutos de la universidá". Dende que tomó posesión del so cargu'l caderalgu de Derechu Constitucional fixo declaraciones polémiques, como aquella na que consideraba l'usu del asturianu pola Universidá d'Uviéu como "una posición ideolóxica", llueu matizaes, y diéronse pasos atrás na presencia del idioma, como'l desaniciu del logu trillingüe p'apaecer namái'l castellanu basándose nel manual d'identidá corporativa de la institución.