La capital de Caravia va tener oficialmente’l nome de Caravia l’Alta en forma billingüe con ‘Prado’

|
Ilesia de Santiagu en Caravia l'Alta por Carmen Morán

Magar que la primer información del Gobiernu yera que ‘Prado’ diba ser el nome de la capital de Caravia cola aprobación de la recuperación de los nomes de llugar tradicionales, el decretu toponímicu rexistra la forma billingüe ‘Caravia l’Alta/Prado’. Cambia tamién el toponimu de la parroquia de Caravia la Baxa, mentes que se caltienen el de tolos núcleos de población como Bandalisque o Los Duesos.

“El Conseyu de Gobiernu aprobó la toponimia oficial del conceyu de Caravia, depués de que’l Conceyu validase’l dictame emitíu pola Xunta Asesora de Toponimia, qu’afita les denominaciones de la so capital como Prado y de les sos dos parroquies como Caravia l’Alta y Caravia la Baxa”, comunicaba’l pasaú día 1 l’Executivu. Una información que sorprendía pola escoyeta de ‘Prado’ como forma única.

Sicasí, la espublización nel Boletín Oficial del Principáu d’Asturies (BOPA) de güei del decretu resolvía la dulda, recuperándose finalmente nome tradicional pa la capital de Caravia l’Alta. Sicasí, la forma definitiva va ser la billingüe, qu’acepta la Llei d’Usu y Promoción del Bable/Asturianu pa casos mui esceicionales onde haya un “usu xeneralizáu na so forma tradicional y en castellanu”.

Nun hai más cambios nos nomes de los núcleos de población del pequeñu conceyu del oriente, calteniéndose Bandalisque, La Cantiella, Pumarín, Los Duesos, Duyos o La Espasa. Sí se rexistren topónimos menores como La Calvera, La Teyera, Morís, La Pebida, El Visu o La Vega.

Cinco conceyos pendientes

Caravia ye’l conceyu númberu 73 en recuperar la so toponimia tradicional, polo que namái queden 5 por completar el procesu. Son Somiedo, Cuideiru, Allande, Ibias y Navia.

Na imaxe, ilesia de Santiagu en Caravia l'Alta. Semeya obra de Carmen Morán baxo llicencia CC BY 4.0.

AdxuntuTamañu
PDF icon BOPA toponimia oficial Caravia229.22 KB
Contador Estadistiques