Confírmase la forma ‘Somiedo’, conceyu númberu 74 n’oficializar la so toponimia tradicional

Queden namái 4 conceyos por oficializar la so toponimia tradicional. El Conseyu de Gobiernu celebráu esti vienres dio’l preste al decretu pol que se recuperen los nomes de llugar de Somiedo, qu’afita esta forma en llugar de ‘Somiedu’ que recoyía, por exemplu, el nomenclátor de l’Academia de la Llingua Asturiana (ALLA).

El procesu de recuperación toponímica sigue avanzando al ritmu anunciáu pola Conseyería de Cultura, Política Llingüística y Turismu, que pretende completar los 78 conceyos no que queda de llexislatura. De momentu, depués del pasu dau por Somiedo, namái queden 4 por finar el trámite: Cuideiru, Allande, Ibias y Navia.

Somiedo conviértese asina nel conceyu númberu 74 en concluyir esti procedimientu que naz con un trabayu de campu de la Xunta Asesora de Toponimia, a pidimientu del Conceyu, pa ellaborar un dictame que pasa pel Plenu municipal enantes de llegar al Conseyu de Gobiernu pal so preste. El siguiente pasu ye la so espublización nel BOPA y, a los 20 díes, la entrada a valir del decretu toponímicu que va convertir a los nomes tradicionales nos únicos oficiales, derogando los anteriores.

Asina, La Pola Somiedo va ser l’únicu nome pa la capital del conceyu en sustitución de ‘Pola de Somiedo’. D’esta forma confírmase la decisión de la Xunta Asesora de Toponimia d’optar pol topónimo Somiedo en cuenta de ‘Somiedu’, tamién mui emplegáu.

Na imaxe, El Puertu n'iviernu.