Día del Llibru Asturianu

“‘En primera persona’ sirve al llector nuevu p’acceder a la lliteratura asturiana”, destaca José Ángel Gayol

|
José Ángel Gayol 'En primera persona'

2019 foi un bon añu pa José Ángel Gayol, con ésitu en concursos lliterarios –destacando’l XXV Premiu Máximo Fuertes Acevedo con ‘El silenciu invisible’– y una obra cola so firma nes llibreríes. Ye ‘En primera persona’, llibru que “sirve al llector nuevu p’acceder a la lliteratura asturiana” y que los más avezaos tamién disfruten.

Asoleyada por Ediciones Trabe, la obra de Gayol “ye un diariu lliterariu” escritu “de manera fragmentada y abierta”, na que l’autor nun fecha les sos anotaciones y reflexones feches “de mediaos del 2017 al 31 d’avientu del 2018”. Nun se trata d’un diariu íntimu, sinón que ta escritu “con vocación de ser públicu”.

“Considérome un adictu a la llectura de diarios, de lo qu’hai poca cultura n’España”, apunta l’escritor de Mieres del Camín, que cita a Pablo Antón Marín Estrada, con dos propuestes, y a Xuan Bello como los dos autores de la lliteratura asturiana que los trabayaren. Asina, “casi ensin querer”, faciendo anotaciones, foi naciendo esti ‘En primera persona’ con una forma d’escribir que ta calteniendo mientres el 2019 y lo que va del 2020 cola intención futura d’espublizales tamién.

“Ye un llibru de fragmentos”, sigue l’autor, “que puede ser d’una páxina o unes frases”, na qu’escribe “lo que veo, lleo o presencio que paga la pena”. Asina’l llector va atopar fechos que-y ocurran, reflexones lliteraries o apuntes de viaxes, ente otres anotaciones del escritor, mientres esi añu y mediu.

“Nun hai una rellaboración posterior de los testos”, añade Gayol, que los considera “mui honestos. Cuando escribo coses que creo que van pasar calténgoles, anque tea equivocáu”. ‘En primera persona’ ye amás un llibru que “sirve tanto pal llector nuevu como pal vieyu. Al nuevu p’acceder a la lliteratura asturiana, pol so calter fragmentáu que facilita la llectura y poles reseñes d’otros llibros, rellatos y cróniques de viaxes que va atopar nuna llingua lliteraria que nun ye barroca”, asegura.

Presentaciones en Mieres, Xixón y Uviéu

Nes selmanes próximes l’escritor y críticu lliterariu va entamar delles presentaciones del so llibru en dellos puntos d’Asturies. La primera va ser mañana a les 19 hores na llibrería La Pilarica, en Mieres, actu nel que va tar acompañáu pola autora Laura Marcos y pola editora Esther Prieto.

Tamién tán confirmaos actos en Xixón, el xueves 6 de febreru, na xixonesa La Buena Letra, y el tamién xueves 13 n’Uviéu, na Llibrería Trabe.

Una novela pa esti 2020

Amás de siguir coles sos anotaciones, la producción lliteraria de Gayol nun apara. Esti añu va espublizar una novela con Trabe, de nome ‘El vacíu del azar’, y va asoleyar ‘El silenciu invisible’, l’ensayu col que ganó nel 2019 el XXV Premiu Máximo Fuertes Acevedo, previsiblemente p’abril o primeros de mayu, trabayu del que ta especialmente satisfechu: “diría que ye ún de los mios meyores llibros”, asegura.

Nun foi la única allegría que llevó l’añu pasáu, yá que ganó tamién el XVII Concursu de Cuentos Curtios del Conceyu Cangas na estaya d’asturianu estándar col so trabayu ‘El llobu’.

Contador Estadistiques