IX insiste n’habilitar el mes de xineru na Xunta Xeneral “p'allonganos d’una reforma estatutaria fallida”

Ovidio Zapico insistió esti xueves na Xunta Xeneral n’habilitar xineru “pa evitar y allonganos d’una reforma estatutaria fallida”, demanda que sofitó nesti día Iniciativa pol Asturianu. El coordinador xeneral d’Izquierda Xunida (IX) esixó “lideralgu al Gobiernu d’Asturies; nun val con iniciar el procesu de reforma del Estatutu”.

“La izquierda, nel so conxuntu, tien marxe de díes suficientes hasta’l 31 d’avientu pa pautar un calendariu que nos posibilite habilitar xineru”, apuntó’l diputáu esta mañana nel alderique de totalidá del Proyeutu de Llei de Presupuestos Xenerales, momentu nel que demandó “lideralgu” al Executivu, al igual que fixo depués Daniel Ripa, voceru de Podemos. “Esti procesu hai qu’entamalu, yá lo fixeron; hai que lideralo, nun lo tán faciendo; y ha concluyir con una aprobación de la reforma y de la inclusión de la oficialidá na mesma enantes de que termine’l próximu periodu de sesiones”, siguió.

Ya’l martes Zapico incidía nesta cuestión, apuntando que lleva meses “clamando” por reactivar les negociaciones, ensin respuesta. “Empecipiar la tramitación en febreru va llevanos más que presumiblemente a nun cumplir los tiempos alcordaos y empezaríamos a falar, poro, d'una reforma del estatutu fallida”, señaló entós, recordando que, una vegada incumplíu’l calendariu que'l pasáu 2 d'ochobre proponía xunto Podemos, la única alternativa sería habilitar xineru.

Voluntá pal consensu

Esti día Iniciativa por Asturianu tamién asoleyaba un comunicáu nel que sofita la propuesta d’IX p’habilitar el mes de xineru na Xunta Xeneral. “La única manera de salvar la reforma estatutaria y la oficialidá ye facer hábil el primer mes del añu 2022 nel Parllamentu. Los partíos tienen que ser conscientes de los plazos colos que cuntamos y que ye imprescindible poner enfotu nesi trabayu”, aseguró.

“Tamos acabantes de presentar un manifiestu robláu por más de 300 profesores d’universidaes de tol planeta que vamos facer llegar a los grupos parllamentarios de la Xunta Xeneral del Principáu d’Asturies. Queremos que los partíos valoren esti manifiestu y que pongan una verdadera voluntá en desatascar la reforma estatutaria”, añadió la organización, que s’ufre pa contribuyir a tender pontes y mediar nesti debate y llograr asina sumar, acercar posiciones y algamar un consensu.