IAS va decidir nel so XVII Alcuentru Nacional la renovación d’una coalición amplia con IX en clave asturiana

Esti vienres va celebrase n’Uvíeu’l XVII Alcuentru Nacional d’Izquierda Asturiana (IAS). La formación, que nes eleiciones pasaes participó xunto con Izquierda Xunida (IX) en Asturies pela Izquierda, va decidir la so postura de cara al 28-M, cola posibilidá de renovar la coalición con IX, siempre en clave asturiana y col enfotu d'axuntar a más fuercies.

IAS lleva dellos meses d’alderique internu sobre una cuestión que va decidir esta tarde, a les 18 hores en primer convocatoria. Un tiempu nel qu’hebo conversaciones con IX de cara a repetir l’alcuerdu del 2019 –algamaron dos representantes na Xunta Xeneral– que se van valorar cola militancia.

La resolución 'Frente Ampliu y Unidá', que salió del anterior Alcuentru Nacional y que la organización presentó’l 25 de mayu, ye la base cola que trabaya IAS de cara a posibles alliances eleutorales. L’enfotu del partíu asturianu ye entamar una coalición amplia a la izquierda de la FSA-PSOE, siempre en clave asturiana y col oxetivu de reeditar una mayoría parllamentaria que faiga posible la reforma estatutaria qu'incluya la oficialidá: “Una alternativa política p’Asturies tien que nacer n’Asturies, con un programa pal pueblu asturianu y con actores asturianos”, afita’l documentu.

‘Convocatoria por Asturias’

Nesi sen, IX ta trabayando nuna ‘Convocatoria por Asturias’, como señaló ayeri’l so coordinador xeneral y candidatu, Ovidio Zapico. “Nosotros, agora mesmo, tamos falando con más fuercies polítiques, nun tamos falando namái con Podemos. Tamos tamién falando, y muncho, y entendémonos mui bien con Más País; tamos faciéndolo tamién con Izquierda Asturiana (IAS); y queremos, tamién, llegar a referentes, como dicía enantes, que nun tán adscritos a nengún d’esos partíos”.