IAS resuelve negociar un alcuerdu eleutoral con IX nuna candidatura "lo más amplia posible"

|
Izquierda Asturiana (IAS) banderes

La resolución del XVII Alcuentru Nacional, aprobada por mayoría, prioriza "l'oxetivu estratéxicu d'asegurar la reforma estatutaria".

Izquierda Asturiana (IAS) recueye'l convite d'Izquierda Xunida (IX) pa reeditar la coalición del 2019, que, baxo'l nome d'Asturies pela Izquierda, algamó dos representantes na Xunta Xeneral y "aseguró presencia y visibilidá a la nuestra organización". Yera'l puntu únicu del orde del día del aconceyamientu celebráu na tarde del vienres n'Uviéu, nel que s'alcordó negociar un alcuerdu eleutoral "nel contestu de la necesidá d'un frente unitariu de la esquierda".

La formación "prioriza l'oxetivu estratéxicu d'asegurar la reforma estatutaria y sorraya la necesidá d'asegurar tanto la presencia del nuestru partíu na ellaboración del programa como nel siguimientu de los alcuerdos". Al empar entiende esti pasu "como'l primeru d'un procesu que se quier más ampliu pa llegar a una candidatura lo más unitaria posible".

En concreto, la resolución marca, na llinia de lo aprobao nel Alcuentru Nacional anterior na resolución 'Frente Ampliu y Unidá', presentada'l 25 de mayu, que la decisión tomada "tien en cuenta la necesidá d'un frente unitariu de la esquierda lo más compactu posible" que se sofita no "negativo de la diversidá de candidatures a la esquierda del PSOE nel actual contestu políticu". El testu alcordáu condiciona la presencia d'IAS na coalición "a la necesidá de participar nos aspectos programáticos, na llinia de lo acontecío nel 2019", y demanda "asegurar la continuidá del alcuerdu políticu a lo llargo de la lexislatura con estructures orgániques que garanticen la presencia d'IAS na coalición con pesu cualitativu, a la hora de que'l grupu parlamentariu tome decisiones polítiques y faiga manifestaciones públiques nos ámbitos onde IAS tien posiciones, esperiences y conocencia contrastada".

Llinia abierta y permanente con Podemos

D'igual forma quier "dexar claro la nuestra discrepancia táctica cola posición electoral y política qu'asume la inevitabilidá de conformase col papel d'accesoriu necesariu o socorrista pal gobiernu de la FSA pol peligru de subordinación acrítica en polítiques negatives pal país". Por último, apunta que "esta decisión compleméntase cola necesidá de caltener una llinia abierta y permanente con Podemos Asturies o los sectores del mesmu favorables a una converxencia más amplia, col envís de llegar al 28 de mayu col mayor nivel posible d'unidá de les fuercies d'esquierda".


 
 

 

Contador Estadistiques