"Hai una ofensiva durísima antiasturianista na nuesa tierra, hai que lo dicir abiertamente", alerta Barbón

El presidente d'Asturies en funciones criticó en Bimenes a la derecha por presentar "como un trunfu impidir el reconocimientu d'oficialidá, aquello que ye normal a la otra parte del Eo".

Adrián Barbón tornó a asistir un añu más a Martimporra pa celebrar la Fiesta de la Oficialidá de la Llingua Asturiana xunto col alcalde Aitor García Corte y otros primeros ediles. "Venimos a poner en valor el patrimoniu cultural d'Asturies nun contestu nel qu'hai una ofensiva durísima antiasturianista na nuesa tierra, hai que lo dicir abiertamente, con toles sos lletres", apuntó'l socialista.

"Lo que tamos asistiendo nes selmanes últimes como consecuencia de lo asocedío'l 28 de mayu ye una involución que pon en riesgu tolos avances de dignificación de la nuesa llinga, de la proteición de la mesma, de la nuesa cultura, de la nuesa identida, de la nuesa tradición, y eso esixe una respuesta", siguió'l de Llaviana, qu'añadió que "lo qu'equí se reivindica ye la nuesa propia identidá, que nun choca con nenguna otra". "Bimenes ye un bon sitiu pa llevantar la voz en defensa de la nuesa cultura, de la nuesa llingua, de la nuesa llibertá y, sobre manera, de la nuesa autonomía política", rescampló.

Entrugáu sobre la oficialidá, respondió que ye "difícil, porque los númberos agora sí que nun dan". Nesti puntu amosó la so crítica a la derecha por celebrar como'l mayor trunfu nestes eleiciones "tener la minoría de bloquéu pa impedir la reforma del Estatutu d'Autonomía".

"A min paezme mui triste que lo presenten como un trunfu. Cómo pue ser un trunfu qu'aquello que ye normal a la otra parte de la Ría del Eo, qu'amás la propia derecha reivindicó nel so día con arguyu, el galleguismu, la defensa del gallegu, la so propia llingua... Equí lo sía l'impedimentu del reconocimientu d'oficialidá". Pa finar, aseguró que "yá que nun se pue dar esi pasu, pueden dase otros munchos pasos pa protexer la nuesa llingua d'esa ofensiva antiasturianista que tamos viviendo".

Na semeya, Barbón, a la derecha, saluda al alcalde García Corte.