García Granda apuesta por dar continuidá al so compromisu col asturianu na Universidá d’Uviéu

El rector Santiago García Granda presentó'l so programa, con versión n’asturianu, pa les eleiciones al Rectoráu de la Universidá d’Uviéu del 12 de febreru. El caderalgu de Química Física apuesta por dar continuidá al so compromisu col asturianu y va afondar “en toles posibilidaes d’entamar los estudios de Filoloxía Asturiana”.

A diferencia del so competidor, Ignacio Villaverde, García Granda fai un usu normal de la llingua asturiana na so campaña eleutoral. Asina, ta acabante d'asoleyar un ampliu programa eleutoral nesti idioma –tamién en castellanu y n’inglés, les otres dos llingües que se pueden ver nel logu de la Universidá d’Uviéu– y presentó un videu nel qu’afirma que “vamos promever les llingües, les clásiques, les europees y l’asturianu”.

Na estaya ‘Estudios nuevos’ asegura que “vamos estudiar la oportunidá d’entamar los estudios de Filoloxía Asturiana y la posibilidá d’introducir la llingua asturiana nes memories de verificación de dellos graos y másteres”. Llueu nel bloque 10, ‘Estensión universitaria, internacionalización y conexón social’, dedica un apartáu a la ‘Llingua y Cultures asturianes’, nel qu’afirma que “a lo llargo tol mandatu cumplióse con toos y caún de los compromisos electorales alquiríos en 2016 nesti terrén”.

Asina apuntó la creación del logu trillingüe “como símbolu de la normalización plantegada nel usu de la llingua autóctona en cartelería o señalética” o, “cumpliendo cola Llei d’Usu”, la disponibilidá de solicitúes y formularios n’asturianu. Tamién la creación del Comité Asesor de Normalización Llingüística, la promoción de servicios de traducción “pa que la información universitaria aportare a la comunidá na nuesa llingua tradicional” y, “lo más importante”, el cumplimientu de la “vieya reivindicación de garantizar la defensa tanto de Tesis Doctorales, como de TFGs y TFMs en llingua asturiana, resolviendo cuantes dificultaes se daben pa ello”.

“Too ello, ensin escaecer el diseñu de planes específicos pa promover y facilitar la investigación en llingua asturiana y la edición d’importantes obres científiques del área de conocimientu de Filoloxía Asturiana”, avanza’l testu.

"Vamos siguir dignificando y visualizando l'asturianu"

García Granda comprométese a “siguir dando preferencia a cualquier actividá rellacionada cola hestoria, la etnografía o la llingua asturiana, impulsando charres, conferencies, cursos y demás aiciones que caltengan y potencien la nuesa identidá cultural”, asina como, repiendo lo espuesto en ‘Estudios nuevos’, a “afondar en toles posibilidaes d’entamar los estudios de Filoloxía Asturiana y les posibilidaes d’ufiertar los servicios de normalización llingüística a tola comunidá universitaria, tanto disponiendo de servicios de traducción como de promoción llingüística y cultural”.

Por último, apunta que se van siguir ufiertando cursos de capacitación llingüística a la comunidá universitaria (estudiantáu, PAS y PDI) y a afondar na collaboración cola Academia de la Llingua Asturiana y los grupos d’investigación universitarios en temes d’estudiu, investigación y divulgación y enanchando l’actividá de la Universidá Asturiana de Branu (UABRA) nel contestu de la Estensión Universitaria. “Y vamos siguir dignificando y visualizando l’asturianu nel contestu universitariu buscando la normalización del usu que la llexislación autonómica obliga a promover”, fina esti bloque.

L'asturianu y Villaverde

Magar que nun use l'asturianu en campaña, Villaverde sí dedica nel so programa un apartáu al idioma. Ye nel nomáu 'Objetivo 9' de la estaya 2 'La gobernanza pública: liderazgo, dirección, gestión', entituláu 'Asturias sí, desde luego. El papel de la lengua y culturas asturiana en las Universidad', nel que defende'l cumplimientu de la Llei d'Usu y se compromete a "respaldar y fomentar el asturiano como bien académico", con delles propuestes.