García Cortina supera a Sagan nel sprint de La Châtre na tercer etapa de la prestixosa Paris-Nice

|
Iván García Cortina gana na Paris-Nice

El xixonés estrénase esta temporada y suma la so segunda victoria como profesional.

Iván García Cortina consiguió ayeri na meta de La Châtre un trunfu de sonadía al superar nel sprin na tercer etapa de la Paris-Nice al trés vegaes siguíes campeón del mundu Peter Sagan (BORA-hansgrohe), segundu ayeri. Nun accidentáu sprint, el ciclista del Barhain McLaren sorprendió al eslovacu y al restu de favoritos pela derecha p'aguantar nos metros finales y alzar los brazos en mou de victoria.

Na xeneral d'esta importante competición ciclista d'ocho etapes per territoriu francés l'asturianu ocupa la posición 29, a 2 minutos y 21 segundos del líder, l'alemán Maximilian Schachmann, compañeru d'equipu de Sagan. Güei tien llugar la cuarta etapa de la carrera, una contrarreló individual de 15 quilómetros en Saint-Amand-Montrond.

L'añu pasáu, en California

El trunfu na Paris-Nice ye'l segundu como profesional de García Cortina, de 24 años, tres l'algamáu l'añu pasáu na quinta etapa del Amgen Tour of California. Tamién foi al sprint ente un grupu de 26 ciclistes que protagonizaron una escapada.

Na imaxe, García Cortina llevanta los brazos énte Saga. Semeya propiedá de la carrera Paris-Nice.

Contador Estadistiques