García Cortina algama nel Tour of California’l so primer trunfu como profesional

|
Iván García Cortina victoria Tour of California

La gran promesa del ciclismu asturianu dexa de selo pa convertise nuna realidá. Depués de raspiar el trunfu en delles carreres, Iván García Cortina llevó la so primer victoria como profesional al ser el más rápidu na quinta etapa del Amgen Tour of California.

El del Bahrain-Merida, de 23 años, aprovechó la so esplosividá nel sprint pa encabezar en meta un grupu reducíu de 26 deportistes que lideraba la carrera y quitóse’l mal saborgu de boca que-y quedó tres finar segundu esta temporada nuna etapa de la Paris-Niza y terceru na Vuelta a Andalucía, cuando tuvo mui cerca d’estrenar el so palmarés. Foi na etapa de 135 milles ente Pismo Beach y Ventura, onde superó al arxentín Maximiliano Richeze (Deceuninck-Quick Step) y al colombianu Sergio Higuita (Education First).

Na xeneral, García Cortina ocupa la posición 92, lloñe del líder (41:58), l’estauxunidense Tejay Van Garderen. El del Education First aventaya a en 4 segundos al danés Kasper Asgreen (Deceuninck-Quick Step) y en 6 al italianu Gianni Moscon (INEOS) a falta de dos etapes d’esta carrera del calendariu UCI WorldTour.

Contador Estadistiques