Espina va aconceyar el día 24 en Madrid cola ministra Alegría pa falar de la especialidá docente

“El ministeriu llegamente nun atopa opciones, a nun ser que sía llingua oficial”, confirmó la conseyera Lydia Espina esti xueves na Comisión d’Educación. Sicasí, anunció que’l día 24 va aconceyar en Madrid cola ministra Pilar Alegía pa tresllada-y en persona los argumentos pa finar con esta “situación claramente inxusta” pa les maestres y maestros d’asturianu y gallego-asturiano.

Nuna entruga d’Adrián Pumares, diputáu de Foro, “sobre qué actuaciones ta faciendo pa que’l Ministeriu d’Educación y Formación Profesional reconoza la especialidá docente pal profesoráu d’asturianu”, Espina respondió que “tolo que ta na nuesa mano, por activa o por pasiva”. Llueu d’una crítica a PP y VOX por oponese nel Congresu a la PNL, presentada por Xuníes Podemos, qu’encamentaba al Gobiernu a creala, aprobada finalmente, apuntó que “retomamos el tema y alcontrámonos otra vez cola puerta atrancada”.

Nin la vía estatal nin autonómica, en consideración del ministeriu, son posibles ensin una declaración d’oficialidá del asturianu y el gallego-asturiano que finaría col problema. “Llegalmente nun atopa opciones pa crear la especialidá, nin pa que lo faigamos nel Principáu y llueu validánosla, a nun ser que sía llingua oficial”, aseguró.

Pumares, tamién críticu col PP pola so oposición y cambiu de criteriu cola especialidá, acusó a la FSA de camudar de discursu con esta cuestión, “porque na llexislatura anterior yera lo contrario, nun facía falta la oficialidá de la llingua asturiana”, y dixo tar esmolecíu por que “la política llingüística d’un Gobiernu que ye favoratible a la oficialidá ye la mesma que tenía’l Gobiernu de Javier Fernández o’l d’Álvarez Areces, roceanos a avanzar na normalización de la llingua asturiana”. D’igual forma, el llavianés apuntó que faló con xuristes al respeuto del problema llegal que tresllada’l ministeriu pa la creación de la especialidá “y ellos nun ven esti problema que me diz”.

“Sinceramente creo que nun hai motivu nengún pa que’l Gobiernu d’España faiga la modificación correspondiente nos reales decretos d’especialidá de Primaria y Secundaria y qu’aquelles comunidaes autónomes que cuenten con llingua propia, nel casu d’Asturies non oficial pero con implantación currícular, pueda desendolcase”, afirmó.

Pronunciamientu de l’Abogacía del Estáu

Espina, na réplica, dio pequeños detalles del trabayu encargáu pola Conseyería de Cultura, Política Llingüística y Turismu a dos xuristes de Derechu Alministrativu sobre la competencia del Gobiernu pa crear la especialidá docente a partir d’un pronunciamientu de l’Abogacía del Estáu, del 2015, “contrariu a la nuesa pretensión”. “L’argumentu base ye que la proteición del asturianu ye decisión de nueso, de la comunidá autonóma, y güei la decisión ye que nun sía llingua oficial, y a consecuencia d’ello tamos como tamos”, amás de citar que nun hai referencia a la especialidá na Llei d’Usu.

“Ensin entrar n’escesivos teunicismos”, esplicó Espina, “paez que l’Abogacía del Estáu entiende que si’l ministeriu crea esta especialidá docente podría tar invadiendo les nueses propies competencies autonómiques, amás de crear una situación distinta a la qu’hai n’otres comunidaes autónomes”. Magar esta posición, “siguimos faciendo esfuercios a lo llargo de tola llexislatura”, apuntando qu’en mayu del 2021 la responsable anterior, Carmen Suárez Suárez, entrugó per escrito al ministeriu al respeuto, atopando una negativa, y que’l 25 de xineru ella mesma solicitara un aconceyamientu con Alegría.

Entamóse entós una mesa téunica de les conseyeríes d’Educación y Cultura con responsables del ministeriu nel que se plantegó una vez les dos víes pa crear la oficialidá, refugándose entrambes otra vuelta. El 25 de febreru Espina tornó a solicitar un alcuentru cola aragonesa, “porque políticamente debería esplicar y razonar los nuesos argumentos”, aconceyamientu que va tener llugar en Madrid definitivamente’l 24 d’esti mes.