El Taller de Llectura n'Asturianu de Corvera recupera l'actividá

Xurde Fernández faló colos presentes de la so obra 'Ucrania y otros nomes de muyer'.

L'estáu d'alarma pola pandemia de COVID-19 impidió la visita del escritor candasín a Les Vegues el 29 de marzu, como taba programáu, un alcuentru que finalmente pudo facese ayeri guardando la distancia de seguranza y respetando tolos protocolos necesarios. El Taller de Llectura n'Asturianu de Corvera vien celebrándose de siguío dende'l 2015 cola intención de "ufrir la pluralidá y diversidá de voces y temátiques de la lliteratura asturiana d’anguaño".

'Ucrania y otros nomes de muyer' (Ámbitu, 2010) foi la llectura protagonista nesta ocasión. Esta obra de Fernández ye un volume de relatos con protagonistes femenines que tracen nes histories mapes d’esperanza, soledá, trabayu, felicidá, suerte y desgracies, toes elles narraciones que nun salen nos llibros d’historia y que muestren situaciones y problemátiques per distintes partes del mundu sobre les qu'aldericaron l'escritor y los asistentes al alcuentru.