El sortéu crucia a Uviéu y Sporting con equipos de Primera RFEF en Copa

Los azules van enfrentase en segunda ronda col líder destacáu del grupu 2, el CD Castellón, mentes que los roxiblancos tornen a Salamanca, agora con Unionistas como rival.

17 yeren los equipos clasificaos de Segunda pa la segunda ronda de la Copa, de los que 9 diben empareyar con contrincantes de Primera RFEF y 8 xugar ente ellos. El sortéu colocó a Uviéu y Sporting nel primer grupu, polo que van contar cola ventaya de tener como rival a un equipu d'inferior categoría, que, eso sí, va exercer de llocal a partíu únicu ente'l 5 y el 7 d'avientu.

Peor foi la suerte del Uviéu, que va tener que viaxar hasta Castelló pa enfrentase a un club que ta protagonizando una temporada espectacular. Depués de quedar a un pasu de xubir l'añu pasáu, elimináu pol Alcorcón, esti añu lidera'l so grupu con 31 puntos, aventayando a 4 al segundu, la UD Ibiza, con 10 victories, 1 empate y 1 derrota.

Los de Carrión lleguen a la segunda ronda depués de superar al Manresa 1-2 con un gol na prórroga de Masca, que tamién abriera'l marcador. El Sporting, mentes, pasaba al superar 0-3 al Guijuelo con tantos d'Asiel en propia puerta, Hassan y el debutante Marcos Fernández, y va tener que tomar la mesma ruta n'autocar pa llegar a Salamanca pa enfrentase nesta ocasión a Unionistas.

Los charros, equipu fundáu por aficionaos como homenaxe a la Unión Deportiva Salamanca llueu de la so desapaición va xusto agora 10 años, van decimocuartos na tabla con 14 puntos, 4 perriba de los puestos de peligru, y a 8 de los de promoción. Xuega los sos partíos nel Reina Sofía, de prau natural y capacidá pa 5.000 persones, polo que de xuru que va repetise un bon desplazamientu d'aficionaos roxiblancos, como asocedió nel Luis Ramos de Guijuelo, onde acudieron 400 aficionaos magar el mal tiempu.

Dos de cinco

Uviéu y Sporting son los dos únicos supervivientes de los equipos asturianos que ganaron plaza esta temporada pa xugar la Copa. L'Atlético de Lugones, que llegó al pasar la previa dende la Primera Asturfutbol, nun pudo plantar cara al Rayo, de Primera División, con que perdió 0-6 en Santa Bárbara.

Sí tuvo cerca de dar la sorpresa el CD Covadonga, que tuvo ganando al Deportivo, de Primera RFEF, nel esiliu de Ganzábal dende'l minuto 32 con un gol de Nino, pero Vázquez igualó nel 89 y los gallegos anotaríen dos tantos más na prórroga. L'Avilés, tamién de Segunda RFEF, viose superáu por otru rival de la tercer categoría estatal, l'Arenteiro, por 0-1.

Na imaxe, momentu del sortéu al salir la bola del Sporting.