El Rayo Vallecano va visitar al Atlético de Lugones en Copa

Sporting y Uviéu van viaxar a Guijuelo y Manresa, mentes qu'Avilés Industrial y CD Covadonga reciben al Arenteiro y al Deportivo.

L'Atlético de Lugones, primer equipu de Primera Asturfútbol, la vieya Preferente, en clasificar pa la primer eliminatoria de la Copa col formatu actual, va debutar na competición col Rayo Vallecano, conxuntu de Primera División. Va ser la selmana del 1 de payares a partíu únicu n'Asturies nun campu por determinar, pola posibilidá de que la Real Federación Española de Fútbol impida al equipu de Llugones usar Santa Bárbara.

La primer bola de los restantes equipos asturianos foi la del Sporting, al que-y tocó un rival de Segunda RFEF del mesmu grupu nel que tán los conxuntos d'Asturies. Ye'l Guijuelo, enfrentamientu nel que los de Miguel Ángel Ramírez van tener la complicación del prau artificial.

Tamién con un equipu de la cuarta categoría va enfrentase l'Uviéu, con un viaxe más llargu. Va desplazase a Catalunya pa xugar col Manresa, qu'amás cuenta con un campu sintéticu.

Nun tuvieron rival de Segunda División l'Avilés nin el Cova, de Segunda RFEF, que van recibir a dos equipos gallegos de Primera RFEF. Los avilesinos van enfrentase al Arenteiro y los uvieínos al históricu Deportivo.

Na imaxe, la papeleta del Llugones, que sacó Juan Núñez, futbolista del Turégano.