El PSOE asume la postura de la FSA y vota a favor de la oficialidá

A los grupos proponentes de la Proposición Non de Llei sobre la Realidá Plurillingüe y Igualdá Llingüística sumóse tamién Teruel Existe.

Magar nun haber alcuerdu pa sacar alantre una enmienda transaccional nes negociaciones ente'l PSOE y los partíos que taben detrás de la propuesta que recoyía les demandes de la Plataforma Igualdá Llingüística, de la que forma parte Iniciativa pol Asturianu, el partíu de Gobiernu finalmente apoyó 3 de los 7 puntos de la PNL, lo que permitió que salieran alantre. Ente ellos, el 4, qu'encamienta al Executivu a “impulsar y apoyar reformes estatutaries pa la oficialidá de les llingües propies qu’entovía nun son oficiales nuna parte o la totalidad del territoriu onde se falen”, en referencia nidia al casu asturianu y al aragonés.

D'esta forma'l PSOE asume la postura tomada con respeuto a les llingües propies d'Asturies pola Federación Socialista Asturiana (FSA) dende'l 32 Congresu, celebráu n'ochobre del 2017. La intención del presidente Adrián Barbón, como yá señaló en delles ocasiones, ye dar entamu depués del branu a les conversaciones p'afrontar una reforma del Estatutu d'Autonomía que recueya, ente otres coses, la oficialidá del asturianu y del gallego-asturiano.

La votación

El puntu 4 de la PNL aprobóse con 194 votos a favor, 153 en contra y 1 astención. A los grupos proponentes, esto ye, Xuníes Podemos y les sos confluencies, ERC-Sobiranistes, Junts y PDeCAT, EAJ-PNV, Más País, CUP, BNG y Compromís, amás d'EH Bildu que s'encargó de defendela nel Congresu, sumóse tamién el PSOE y diputáu de Teruel Existe, Tomás Guitarte.

Los grupos que votaron en contra foron PP, VOX, Ciudadanos, UPN, PRC, Coalición Canaria y Isidro Martínez Oblanca, representante de Foro. Mentes, Pedro Quevedo, de Nueva Canarias, astúvose.

Na semeya, minutu de silenciu en memoria de les víctimes de los atentaos del 11-M del 2004 celebráu al entamu de la sesión de güei nel Congresu.